बैतडी । बैतडीको पाटन प्राथमिक स्वास्थ्यकेन्द्रमा रहेको एक्स–रे मेसिन जनशक्तिको अभावका कारणा पाँच महिनादेखि प्रयोगविहीन भएकाे छ । प्राथमिक स्वास्थ्यकेन्द्र पाटनमा रहेको एक्स–रे मेसिन सञ्चालन गर्ने जनशक्तिको अभाव हुँदा त्यत्तिकै थन्किएको हो । एक्स–रे मेसिन सञ्चालनमा नआउँदा बिरामीहरूलार्इ समस्यामा परेका छन् ।
पाटन प्राथमिक स्वास्थ्य केन्द्रका हेल्थ असिष्टेन्ट लोकेन्द्र ऐरका अनुसार एक्स–रे मेसिन जडान गरेको दिनदेखि एक दिन पनि सञ्चालनमा आएको छैन । स्वास्थ्य बीमा कार्यक्रमअन्तर्गत बिमितलाई लक्षित गर्दै एक्स–रे मेसिन आएको भए पनि जनशक्ति नहुँदा त्यत्तिकै थन्किएको हो । उनले भने, “एक्स–रे सञ्चालन गर्ने रेडियोग्राफर नहुँदा एक्स–रे मेसिन सञ्चालनमा आउन सकेको छैन, दरबन्दी छैन, अरु तालीमप्राप्त जनशक्ति छैन ।”
उता केशरपुर प्राथमिक स्वास्थ्य केन्द्र मेलौलीका लागि एक्स–रे पनि पाटन प्राथमिक स्वास्थ्य केन्द्रमै थन्किएको छ । एक्स–रे मेसिन आएको पत्र मात्रै प्राथमिक स्वास्थ्य केन्द्रमा पुगेको र एक्स–रे अहिलेसम्म पाटनमै थन्किएको केशरपुर प्राथमिक स्वास्थ्य केन्द्रका हेल्थ असिष्टेन्ट मुकेश दयालले जानकारी दिए ।
एक्स–रे सञ्चालन गर्ने जनशक्ति मेलौलीमा पनि छैन । नले भने, “भएका एक्स–रे मेसिनसमेत सञ्चालन नआउँदा सामान्य चोटपटक लागेको बिरामीले जिल्ला अस्पताल, उपक्षेत्रीय अस्पताल डडेल्धुरा र सीमावर्ती भारतीय अस्पताल धाउनु परेको छ ।”
