☰ open Loading... 18 August 2019|   आइतवार, भदौ १, २०७६

सुमार्गीको हेलो नेपालले ७९ करोड रोयल्टी तिरेन

  |

दूरसञ्चार प्राधिकरणले नेपाल स्याटेलाइट टेलिकम प्रालि (हेलो नेपाल)लाई फ्रिक्वेन्सी दस्तुरको बक्यौता बुझाउन १५ दिने अल्टिमेटम दिएको छ । व्यवसायी अजेयराज सुमार्गीसमेतको लगानी रहेको हेलो नेपालले सरकारलाई फ्रिक्वेन्सी दस्तुरबापत ७९ करोड ९२ लाख २७ हजार रुपैयाँ बुझाउन बाँकी छ ।

बक्यौतामध्ये सात करोड रुपैयाँ १५ दिनभित्र भुक्तानी गर्न अल्टिमेटम दिँदै प्राधिकरणले बाँकी रकम तिर्न तीन महिनाको समय दिएको छ । तत्काल तोकिएको बक्यौता नबुझाए लाइसेन्स स्वतः खारेज हुने प्राधिकरणका प्रवक्ता मीनप्रसाद अर्यालले जानकारी दिए । ‘१७ साउनमा बसेको प्राधिकरण सञ्चालक समितिको बैठकले हेलो नेपाललाई बक्यौता रकम तिर्न १५ दिन र तीन महिनाको अल्टिमेटम दिएको छ,’ उनले भने, ‘पहिलो १५ दिनमा सात करोड रुपैयाँ र त्यसपछिको तीन महिनाभित्र बक्यौता तिर्न निर्देशन दिएका छौँ ।’ दूरसञ्चार ऐन, २०५३ को दफा २८ को उपदफा ३ अनुसार तोकिएको समयमा बक्यौता नबुझाए लाइसेन्स स्वतः रद्द हुनेछ ।

वर्षौँदेखिको ताकेता
हेलोले चार आर्थिक वर्षदेखिको फ्रिक्वेन्सी दस्तुर बुझाएको छैन । आर्थिक वर्ष ०७२/७३ देखि ०७५/७६ सम्मको दस्तुर बुझाउन बाँकी छ । प्राधिकरणले सुरुदेखि बक्यौता बुझाउन ताकेता गरे पनि हेलोले विभिन्न बहाना देखाउँदै आएको छ । हेलोले यसअघि भिस्याटबापतको २७ लाख रुपैयाँ पनि तिर्न अटेर गरेको थियो । तर, प्राधिकरणले लाइसेन्स रद्द गरिदिने चेतावनी दिएपछि गत जेठमा भिस्याटबापतको शुल्क बुझाएको थियो ।

बक्यौता तिर्न अन्तिम मौका 
संघीय संसद्को अर्थ समितिले गत पुसमा दूरसञ्चार कम्पनीको बक्यौता रकम एक महिनाभित्र असुल गर्न प्राधिकरणलाई निर्देशन दिएको थियो । प्राधिकरणले गत माघमा तीन महिनाभित्र बक्यौता रकम बुझाउन हेलोलगायत नौवटा दूरसञ्चार कम्पनीलाई निर्देशन दिएको थियो ।

प्रकाशित मितिः शुक्रबार, साउन २४, २०७६     6:27:09 PM
error: Content is protected !!