☰ open Loading... 14 July 2024|  

बाँकेको बाल सुधार गृहमा झडप, ६ जना घाइते
पश्चिम नेपाल   | १५ पुष २०८०, आईतवार १९:१०

बाँकेको नौबस्तामा रहेको बाल सुधार गृहमा झडप हुँदा ६ जना घाइते भएका छन्। भक्तपुर र वीरगन्जबाट आएको समूह र जयेन्तु बाल सुधार गृहको टोलीबिच झडप हुँदा ६ जना घाइते भएका हुन्।

शुक्रबारदेखि यहाँ तनाव सिर्जना भएको हो। जयेन्तु बाल सुधार गृहबाट आएको समूहमा केही भक्तपुर र वीरगन्जबाट आएकाहरु पनि छन्।

शुक्रबार साँझ झडप भए पनि शनिबार र आइतबार झडप भएको छैन। तर अहिले पनि अवस्था भने तनावग्रस्त नै छ। यहाँ सुरक्षाकर्मीले स्थिति नियन्त्रणमा लिन खोजिरहेका छन्। बाल सुधार गृहमा रहेका दुई समूहले भने तोडफोडमा उत्रिएका छन्।

आइतबार दिउँसो एक समूहसँग झडप नगर्ने सहमति भए पनि अर्को समूहले उक्त सहमति कार्यान्वयन नगरी तनावको स्थिति सिर्जना भएको बाँकेका सहायक प्रमुख जिल्ला अधिकारी जोरा सिंह माझीले जनाए।

महिला, बालबालिका तथा ज्येष्ठ नागरिकमन्त्री सुरेन्द्रराज आचार्यले सोमबार उक्त बाल सुधार गृहको विधिवतरुपमा उद्घाटन गर्ने कार्यक्रमसमेत थियो। अब उक्त कार्यक्रम प्रभावित हुने देखिएको छ।

‘उद्घाटन गर्न आउनु भएका मन्त्रीसँग लिखित माग राख्ने र समय भएसम्म पाँच/सात मिनेट मौखिक छलफल गर्ने भनेर एक समूहसँग सहमति भएको थियो,’ सहायक प्रमुख जिल्ला अधिकारी माझीले भने। साथै उक्त तनावग्रस्त क्षेत्रमा राजस्व अनुसन्धान कार्यालयको गाडीमा समेत आगजनी भएको छ।

अधिकारीहरुले आफ्नो समस्या समाधान गर्ने लगायतका माग बाल सुधार गृहमा रहेका बन्दीहरुले राखेको मानवअधिकारकर्मी वसन्त गौतमले जनाए। तर, उनीहरुका ठोस माग भने छैनन्।

दुई समूहले एकले अर्कोलाई कुटपिट गर्न खोजेपछि प्रहरीले रोक्ने प्रयास गरिरहेको जिल्ला प्रहरी कार्यालय बाँकेका प्रमुख तथा प्रहरी उपरीक्षक (एसपी) सुवासचन्द्र बोहराले जनाए।

यस बाल सुधार गृहमा १८ वर्षभन्दा माथिका मात्र बन्दी छन्। केही समय अघि मात्र सञ्चालनमा आएको उक्त बाल सुधार गृहमा एक सय १६ जना बन्दीहरू छन्।