☰ open Loading... 20 June 2024|  

प्रशासकीय अधिकृत सहित तीन जनामाथि मुद्दा दायर
पश्चिम नेपाल   | २० जेष्ठ २०८१, आईतवार २१:३७

अख्तियार दुरुपयोग अनुसन्धान आयोगले मुखियापट्टी मुसहरनियाँ गाउँपालिकाका प्रमुख प्रशासकीय अधिकृत सावन कुमार चौधरीमाथि मुद्दा दायर गरेको छ।

भ्रष्टाचार गरेको अभियोगमा आइतबार आयोगले चौधरीविरुद्ध विशेष अदालत काठमाडौँमा मुद्दा दायर गरेको हो ।

धनुषाकै सहिद नगर नगरपालिकामा प्रमुख प्रशासकीय अधिकृतको जिम्मेवारमा रहँदा अधिकृत चौधरी विद्यालयमा बनाइएको पर्खाल भुक्तानी गर्न नक्कली ठेकेदार कम्पनी खडा गरी २ लाख ७५ हजार रुपैयाँ राज्य कोसको दुरुपयोग गरेको आरोपमा अख्तियारले सावन कुमारसँगै रमेशकुमार चौधरी र गुरुदेव यादवविरुद्ध भ्रष्टाचार मुद्दा दायर गरेको हो।

इन्जिनियर चौधरीले सेवाग्राहीसँग घुस मागेको अख्तियारले सूचना पाएपछि अख्तियार दुरुपयोग अनुसन्धान आयोग बर्दिबासबाट खटिएको टोलीले इन्जिनियर चौधरी र उनका साथी यादवलाई सेवाग्राहीसँग लिएको १ लाख नगद र १ लाख १५ हजार चेकसहित पक्राउ गरेको थियो।

अख्तियारले सहिद नगर नगरपालिकाका तत्कालीन इन्जिनियर रमेशलाई घुससहित नियन्त्रणमा लिएर अनुसन्धान गर्दै जाँदा प्रमुख प्रशासकीय अधिकृत चौधरीले २०७९/८० को सम्पन्न योजनाको भुक्तानीका लागि रुफ कन्सल्टेन्सी एण्ड कन्सट्रक्सन कम्पनीसँग अधिकृत चौधरीको मिलेमतोमा घुस लिएको ठहर गर्दै विशेष अदालतमा उनीहरूमाथि मुद्दा दायर गरेको हो।