सिरियाको लताकिया र टार्टसमा सेना र पूर्व राष्ट्रपति बसर अल-असदका समर्थकहरूबीच विगत केही दिनदेखि झडप भइरहेको छ। यस हिंसाका कारण दुई दिनमा एक हजारभन्दा बढीको मृत्यु भइसकेको छ।

यो मृत्युको संख्या २०११ मा भएको सिरियाली गृहयुद्धपछिको सबैभन्दा उच्च हो। यो जानकारी सिरियामा भइरहेको युद्धको निगरानी गर्ने संस्था सिरियन अब्जर्भेटरी फर ह्युमन राइट्सले दिएको हो।

संस्थाका अनुसार पछिल्ला दुई दिनमा सुरक्षा बलले अलाविट मुस्लिम समुदायका ७४५ भन्दा बढी मानिसहरूलाई मारेको छ। तीमध्ये धेरै जसोलाई झुण्ड्याइएको छ। यसबाहेक १४८ जना असद समर्थक लडाकूहरू पनि मारिएका छन्। साथै, यस हिंसामा १२५ सुरक्षाकर्मीको पनि मृत्यु भएको छ।

गत वर्ष डिसेम्बरमा भएको विद्रोहपछि बसर देश छोडेर रुस गएका थिए। यसपछि, सिरियामा लडाकू संगठन हयात तहरीर अल-शामले सत्ता आफ्नो हातमा लियो।

सिरियाली सरकारले असदप्रति वफादार लडाकूहरूले सुरक्षा बलमाथि आक्रमण गरेपछि हिंसा भड्किएको बतायो। यसैबीच, असारका लडाकूहरूले सुरक्षा बलमाथि आवासीय क्षेत्रहरूमा बमबारी गरेको आरोप लगाएका छन्।

रिपोर्टका अनुसार सुरक्षा बलले एक व्यक्तिलाई पक्राउ गर्न खोज्दा झडप सुरु भएको थियो। यसपछि सरकारले लताकिया र टार्टसमा ठूलो संख्यामा सेना तैनाथ गरेको छ। साथै, कर्फ्यु लगाउने आदेश पनि दिइएको छ।

लताकिया र टार्टस प्रान्तमा भएको हिंसाले अबु मोहम्मद अल-जुलानीको नेतृत्वमा रहेको सरकारलाई चुनौती दिएको छ। यी क्षेत्रहरू पूर्व राष्ट्रपति बसर अल-असदप्रति वफादार रहेका अलावाइट समुदायको गढ हुन्। गत वर्ष डिसेम्बरमा बसर अल-असदलाई सत्ताबाट हटाइएपछि सिरियामा भएको यो सबैभन्दा हिंसात्मक भिडन्त हो।

जुलानीले कसरी कू गरे

मिडिया रिपोर्टका अनुसार २०१६ मा सिरियाली गृहयुद्ध समाप्त भएदेखि, जुलानी आफ्ना लडाकुहरूलाई बलियो बनाउन व्यस्त छन्। उनले चीनका उइगर मुस्लिमदेखि अरब र मध्य एसियाका मानिसहरूको सहयोगमा आफ्नो सेना तयार पारे।

जुलानीले सही समयको प्रतीक्षा गरे, जुन इजरायल-हमास युद्ध र रूस-युक्रेन युद्धसँगै आयो। २०२२ मा युक्रेनमा युद्ध सुरु भयो र रुस त्यहाँ व्यस्त भयो। यसैकारण रुसले सिरियाबाट आफ्नो सेना फिर्ता बोलायो।

त्यसपछि २०२३ मा इजरायल र हमासबीच युद्ध सुरु भयो। परिणामस्वरूप सिरियामा असदलाई सहयोग गरिरहेका इरान र हिजबुल्लाहले अब उनीमाथि ध्यान दिन सकेनन्। हसन नसरल्लाहको मृत्युपछि हिजबुल्लाह कमजोर भयो। यसको फाइदा उठाउँदै, जुलानीले सिरियाली सेनामाथि आक्रमण गरे र ११ दिनमा राष्ट्रपतिलाई अपदस्थ गरे। एजेन्सी