विसं २०६२ भदौमा आएको पहिरोले २०५ रोपनी खेत सिचाई गर्ने कुलो भत्किएपछि हालसम्ममा ती परिवार विस्थापित भएको स्थानीय जयदत्त भट्टले जानकारी दिए । सुर्नया नदीबाट तीन किलोमिटर टाढाबाट परम्परागतरुपमा स्थानीयले निर्माण गरेको कुलो भत्किएपछि आफूहरुले विस्थापित हुनुपरेको हो, उनले भने “अहिले ५० घरपरिवार महारुद्र गाविसको वडा नं ६, ७ र ८ मा छरिएर बसेका छौ ।”

कुलोभत्केपछि कुलो निर्माणका लागि सरकारी निकायहरुसंग धाउँदा समेत केही पार नलागेपछि आफूहरुले विस्थापित हुनुपरेको स्थानीय लालमणि भट्टले बताए ।

उनले भने “वर्षको तीनखेती हुने मैदानी फाँट सिचाईको अभावमा बाँझै रहेपछि अहिले हातमुख जोर्न समेत समस्या भएको छ ।” दलका नेताहरुले पनि हाम्रो समस्या नबुझेको उनीहरुको गुनासो छ । चुनावमा भोट माग्न आउँदा आश्वासन मात्रै दिए । चुनाव जितेपछि फर्केर पनि नहेरेको स्थानीयको गुनासो छ ।

धान, गहुँ र फलफूल प्रशस्त फल्ने स्यालतडी मुद्रेमा अहिले सिस्नु फुलेको उनले बताए । जिल्ला विकास समितिले कुलो निर्माणका लागि रु पाँच लाख बजेट विनियोजन गरेकाले यो वर्ष समस्या समाधान हुने जिल्ला विकास समिति बैतडीका सूचना अधिकृत विक्रमबहादुर चन्दले जानकारी दिए ।

स्यालतडी मुद्रेका बासिन्दाको खाद्य अधिकार हनन् भएको भन्दै याक नेपाल, कैलालीले पनि सरोकारवाला निकायको ध्यानाकर्षण गराउँदै आएको याक नेपालका वरिष्ठ कार्यक्रम अधिकृत देवी खनालले जानकारी दिए ।

कुलो भत्केको एक दशक बित्दासमेत समस्या समाधान नहुदाँ स्थानीय चिन्तित बनेका छन् । सङ्घर्ष समिति गठन गरेर तीन वर्षयता जिविस, खानेपानी, सिचाई, कृषि लगायतका कार्यालय धाउँदै आएको भएपनि समस्या कसैले नबुझेको उनीहरुको गुनासो रहेको छ ।

nepalkhabar : RSS