धनगढी । कैलालीको अत्तरियाबाट शनिबार ‘वित्तीय जागरण राष्ट्रिय अभियान’ सुरु भएको छ । नेपाल राष्ट्र बैंकका गभर्नर डा चीरञ्जीवी नेपालले अत्तरियामा आयोजित कार्यक्रममा वित्तीय साक्षरता बढाउन आ–आफ्नो ठाउँबाट भूमिका निर्वाह गर्न सबैलाई आग्रह गर्दै सुदूरपश्चिमका विभिन्न जिल्लाका ग्रामीण इलाकामा बैंक तथा वित्तीय संस्थाको उपस्थिति अझै बलियो नरहेको बताए । जनसङ्ख्यालाई वित्तीय पहुँचमा ल्याउन सरकारले एक घर एक खाता योजना अघि सारेको उहाँले जानकारी दिए ।।
नेपाल राष्ट्र बैंक धनगढी शाखाका निर्देशक विश्रुत थापाले सुदूरपश्चिममा दुई सय तीनवटा बैंक तथा वित्तीय संस्थाका शाखा रहेको र यी संस्थालाई वित्तीय साक्षरता बढाउने खालका कार्यक्रम सञ्चालन गर्न सुझाव पनि दिए । ।
कार्यक्रममा मिडिया इन्टरनेसनल र एनआइसी एसिया बैंकको सहकार्यमा प्रकाशन गरिएको वित्तीय साक्षरतासम्बन्धी पुस्तकको दोस्रो संस्करण सार्वजनिक गरिएको थियो ।
यसअघि यहाँ आयोजित जनचेताना ¥यालीमा बैंक तथा वित्तीय संस्थाबाट ऋण लिएर उद्यमशीलतामा लागेका व्यक्तिलाई उदाहरणका रुपमा प्रस्तुत गरी बैंक तथा वित्तीय संस्थाको महत्व र त्यसबाट लिन सकिने फाइदाबारे सर्वसाधरणलाई अवगत गराइएको थियो ।
यस्तै पैसा के हो, यसको परिचालन कसरी गर्ने, बैंक तथा वित्तीय संस्थासँग कारोबार गर्दाका फाइदाबारे पनि सूचनामूलक स्टलमार्फत जानकारी पनि गराइएको थियो । नेपाल राष्ट्र बैंकले प्रवद्र्धन गरेको यो जागरण अभियानलाई वाणिज्य बैंकको छाता सङ्गठन नेपाल बैंकर्स सङ्घ, विकास बैंकको छाता सङ्गठन नेपाल डेभलपमेन्ट बैंकर्स एसोसियसन र लघुवित्त वित्तीय संस्थाको छाता सङ्गठन माइक्रो फाइनान्स बैंकर्स एसोसियसन अफ नेपालले पनि साथ दिएका थिए ।
नेपालमा अझै पनि ६० प्रतिशत नागरिक बैंकिङ पहुँचभन्दा बाहिर रहेको र अझै पनि करिब २० प्रतिशत नागरिक साहु महाजनसँग नै कारोबार गरिरहेको खवस्थामा बीच मिडिया इन्टरनेसनले गरेकोे यस कार्यक्रमले वित्तीय साक्षरता बढाउन निकै महत्वपूर्ण सहयोग पुग्ने अपेक्षा गरिएको छ ।