विखण्डनकारी सर्पका हरेक फणालाई कुल्चिइनेछु

प्रधानमन्त्री पुष्पकमल दाहाल ‘प्रचण्ड’ले मधेसका जनतालाई आफ्ना असन्तुष्टिहरु मतपत्रमार्फत जाहेर गर्न अपील गरेका छन् ।मंगलबार साँझ देशबासीलाई सम्बोधन गर्दै प्रधानमन्त्री प्रचण्डले संविधान संशोधनप्रति सरकार प्रतिवद्ध रहेको बताए । एमालेतर्फ लक्षित गर्दै उनले एउटा पक्षको अवरोधका कारण तीन महिनादेखि संशोधनमाथि छलफल हुन नसकेको र संविधानमा नै गतिरोधमा पर्ने खतरा देखिएकाले चुनाव घोषणा गरेको बताए ।

संविधान संशोधन विधेयक अघि बढाउँदा निम्न स्तरको गाली समेत सहनु परेको भन्दै उनले संविधान संशोधन र निर्वाचनलाई एकसाथ अघि बढाइने बताए ।

संशोधनप्रति आफू अहिले पनि प्रतिवद्ध रहेको भन्दै उनले भने, ‘यो निर्वाचनले मधेशलाई आफ्नो असन्तोष मतपत्रबाट जाहेर गर्ने अवसर दिएको छ र यो अवसरको सदुपयोग हुनुपर्छ ।’

मधेस केन्द्रित दलहरुलाई पनि आवेग होइन, विवेक र राष्ट्रप्रति जिम्मेवारी देखाउन प्रधानमन्त्री प्रचण्डले आग्रह गरेका छन् । ‘मधेसी जनताको विकास र मधेसी जनताको सरकार अब मतपेटिकाका रुपमा मधेसी जनताको दैलोमा छ । यो ऐतिहासिक अवसरलाई मधेसी जनताले एउटा उत्सवका रुपमा सहर्ष स्वीकार गर्नेमा सरकार पूर्णतः आशावादी छ,’ उनले भनेका छन् । उनले शान्ति सुरक्षामा कुनै कमि हुन नदिने भन्दै निर्वाचनमा एक(एक मतको सुरक्षा गर्ने बताए ।

‘विखण्डनकारी सर्पका हरेक फणालाई कुल्चिइनेछ’

प्रधानमन्त्री प्रचण्डले अहिले पनि संघीयता, गणतन्त्र जस्ता उपलब्धि उल्टाउने खेल भइरहेको बताए ।  केहीले जनताको आवेगलाई भड्काएर देशलाई नै विखण्डन गर्ने सपना देखेको भन्दै उनले भने, ‘म आज यही सम्बोधनबाट खुला रुपमा भन्न चाहन्छु, विखण्डनकारी सर्पका हरेक फणा कुल्चिइनेछ । हिमाल होस्, पहाड होस् वा तराई, कुनै पनि अतिवाद सहन गरिने छैन ।’

प्रधानमन्त्री प्रचण्डले स्थानीय चुनावले संविधान र अझ सिङ्गो लोकतन्त्रकै कार्यान्वयनमा ऐतिहासिक महत्व राख्ने भन्दै यो प्रधानमन्त्री वा सरकारको मात्र परीक्षा नभएको बताए । उनले भने, ‘बरु, यो सबै राजनीतिक दलको, लोकतन्त्रको र सिंगो राष्ट्रकै परीक्षा हो ।’

उनले अघि भने, ‘झण्डै बीस वर्षदेखि हुन नसकेको स्थानीय तहको निर्वाचन गराई छाड्ने घोषणा गर्दा मलाई कुनै अनिश्चय र संशय होइन, बरु गौरवबोध छ । बीस वर्षसम्म कसैले सोच्नसम्म हिम्मत नगरेको यो निर्वाचन गराइछाड्ने मेरो यो आँट र विश्वासको स्रोत जनता नै हो ।’

निर्वाचन लोकतन्त्रको सबैभन्दा ठूलो उत्सव भएको भन्दै उनले बिना संशय, बिना धक, बिना डर, मन वचन र कर्मले उत्साहका साथ सहभागी हुन देशवासीलाई आहृवान गरेका छन् ।