धनगढी । राष्ट्रियसभा सदस्यका लागि प्रदेश नं ७ मा आज भएको निर्वाचनमा २२७ मतदाताले मतदान गरेका छन् । बिहान १०ः०० बजेदेखि शुरु भई अपराह्न ३ः०० बजे सकिएको मतदानमा ५३ प्रदेश सांसद र १७६ नगरपालिकाका प्रमुख तथा उपप्रमुख र गाउँपालिकाका अध्यक्ष तथा उपाध्यक्ष गरी २२९ मतदाता रहेका थिए ।
मतदानमा कैलाली जिल्लाबाट समानुपातिक कोटामा राष्ट्रिय जनता पार्टीबाट निर्वाचित सांसद मालमती रानाथारु र प्रदेशसभामा सोही पार्टीका प्रत्यक्ष निर्वाचित कृष्णबहादुर चौधरी अनुपस्थित रहेको जनाइएको छ ।
प्रदेश नं ७ मा दलित र अल्पसंख्यक अपांग समूहमा मनोनयन दर्ता गराएका उम्मेदवारबीच प्रतिस्पर्धा भइरहेको छ । दलिततर्फ नेपाली काँग्रेसका शेरीराम पार्की र नेकपा एमालेका चक्र स्नेही तथा अल्पसंख्यक अपांगतर्फ काँग्रेसका छत्रराज जोशी तथा नेकपा (माओवादी केन्द्र) का महेशकुमार महरा उम्मेदवार रहनुभएको छ ।
खुला र महिलातर्फका गरी छ जना सदस्यमा काँग्रेसका बद्रीप्रसाद पाण्डेय, एमालेका शेरबहादुर कुँवर र माओवादी केन्द्रका हरिराम चौधरी, महिला समूहमा एमालेका इन्दु कडरिया र कमलाकुमार ओली, काँग्रेसका तारादेवी भट्ट भने यसअघि नै निर्विरोध निर्वाचित भएका छन ।
डोटीको सिलगढीमा भएको निर्वाचनको मतगणना केहीबेरमा शुरु हुन लागेको मुख्य निर्वाचन अधिकृत जयानन्द पनेरुले जानकारी दिए ।
