नन्द बहादुर रोकाया
मुगु । मुगुका उच्च पहाडी तथा हिमाली क्षेत्रमा हिमपात भएसँगै जंगली जनावर र पक्षीको चोरी सिकार गर्ने क्रम बढेको छ । हिउँमा फसेका मृगसहितका जनावर र चिसोले बेसी तिर झरेका पंक्षीको सिकार गर्ने क्रम बढेको हो ।
हिमपात भएपछि जनावर तथा पंक्षीको सिकार गर्न सजिलो हुने भएकाले उच्च पहाडी जिल्लाका जंगली क्षेत्रमा सिकारका लागि जानेको संख्या बढेको बताईएको छ ।
मुगुमा धेरैजसो गाउँपालिकाका वनहरुमा बन्दुक, भाला, हसिँया, लाठी लगायतका घरेलु हतियार र सिकारी कुकुरसहित मानिसहरु रतुवा, घोरल, झारल, थारल, बंदेल लगायत जंगली जनावर र डाँफे, कालिज लगायत पक्षीको सिकार गर्ने क्रम बढेकाे छ ।
अहिले हिमाली भेगमा सिकारको सिजन सुरु भएको छ । मुगुका हिमाली क्षेत्र करानको लेख, चंखेली, मुर्मा रारा, कालामुल, घुच्ची लगायतका खत्याड र सोरुका उच्च भुभागहरुमा वनक्षेत्रमा सिकार गर्ने क्रम चलिरहेको छ ।
सिकार गरेको डाँफे सदरमुकाम लगायतका आसपास क्षेत्रमा एउटाको २ हजार ५ सयदेखि ३ हजार ५ सय सम्ममा बिक्री हुने गरेको छ । यस्तै जंगली जनावर झारल, नाउर, रतुवाको मासु प्रतिकेजी १ हजारदेखि १५ सयसम्म बिक्री हुने गरेको छ । हिउँ परेपछि सिकार गर्ने क्रम बढेकाले जंगली जनावर तथा पक्षी संकटमा परेका हुन् ।
