पर्यटकलाई गाऊँ स्वागतको तयारी

पिना (मुगु) :  कर्णाली रारा पर्यटन बर्षमा पर्यटकको स्वागतका लागि स्थानीय उत्साही भएका छन् । पर्यटन बर्ष मूल समितिले रारामा होटलको अभाव भएपछि पर्यटक र अतिथिलाई गाउँमा बासको व्यबस्था गर्ने निर्णय गरेको छ ।

पाहुनालाई गाउँमा बसाउने निर्णय भएपछि पिना, झयारी, कोटीला, ताल्चा, तलितुम लगायत १२ गाउँका स्थानीयले स्वागतको तयारी थालेका छन् ।

स्थानीयले पर्यटक आउने भएपछि आफ्नो घर र वरपरको वातावरण सफाई गर्न थालेका छन् । स्थानीयबासी अहिले घर लिपपोत, आँगनको सरसफाई, बिजुली र शौचालयको व्यबस्थापनमा लागेका छन् ।

कमेरो र रातो माटोले लिपेर परम्परागत घरहरू चिटिक्क बनाइएको छ । ‘आएका पाहुनालाई कसरी सत्कार गर्ने र खानपिनको ब्यबस्था गर्ने भन्ने बिषयमा योजना बनाउन र त्यसको कार्यान्वयन गर्न थालिएको छ,’ पिना गाउँका धर्मराज बमले भने,‘ राष्ट्रिय निकुन्जको मध्यवर्ती क्षेत्रका बस्तीमा सात सय बढी पर्यटक अटाउनेगरि तयारी थालिएको छ ।’

छायाँनाथ रारा नगरपालिका ७ का वडा अध्यक्ष हरिचन्द्र शाहीले गाउँमा बास बस्न आएका पाहुनाहरूलाई फुलमाला र अबिरले स्वागत गर्ने र बेलुका देउडा, झोडा चम्फा लगायतका पुराना नाच देखाइने बताए । पर्यटकलाई स्थानीय मन्दिर र अन्य पर्यटकीय स्थलको समेत अवलोकन गराउने तयारी गरिएको उनले जनाएकाे खवर कान्तिपुरमा छ ।

सडक सुधार

रारा आउने पर्यटकको सहजताका लागि मुगु र जुम्लाको सिमाना घुच्चीलेकदेखि गमगढी बजारसम्मको सडक सुधार गर्न थालिएको छ । सडक डिभिजन कार्यालय जुम्लाबाट डोजर मगाएर सडक फराकिलो बनाउन थालिएको हो ।

सडकमा गिट्टी बिछ्याउने, नाला सफा गर्ने, लगायतका कामलाई तिब्रता दिएको डिभिजनले जनाएको छ । घुच्चीलेकदेखि गमगढीसम्मको सडक फराकिलो र सफा देखिन थालेको स्थानीयले जनाए । बिभिन्न स्थानमा पार्किङ्कको ब्याबस्था गरिएको छ । रारा आउने पाहुनाको सहजताको लागि सडकको सुधार गरिएको जुम्ला सडक डिभिजन कार्यालयले जनाएको छ ।

मदिरा निषेध
कर्णाली रारा पर्यटन बर्षको अबधिभर पाहुना बसाउने गाउँमा मदिरा निषेध गरिएको समितिले जनाएको छ । मदिरा सेवनले गाउँमा बस्न आएका पर्यटकलाई नकारात्मक असर जाने भन्दै समितिले निषेध गरेको जनाएको छ ।

गाउँमा मदिरा नियन्त्रण गर्न युवा समिति र महिला समितिलाई सक्रिय बनाइएको छ । शान्ति सुरक्षा सहज बनाउन र कुनै अप्रिय घटना हुन नदिन मदिरा निषेध गरिएको प्रमुख जिल्ला अधिकारी उमाकान्त अधिकारीले बताए ।

युवा समिति गठन

रारा आएका आन्तरिक तथा बाह्य पर्यटकलाई रारा र आसपासका क्षेत्रमा घुमाउन युवा समिति गठन गरिएको छ । युवाले नै पर्यटकलाई रारासम्म ल्याउने छन् । समितिमा पढेलेखा युवायुवतीलाई सहभागी बनाएर सबैजसो गाउँमा समिति गठन गरिएको हो ।