सुर्खेत । मध्यपश्चिमाञ्चल विश्व विद्यालयलाई गुण्डागर्दीको थलो नवनाउन कर्णालीका मुख्यमन्त्री महेन्द्रबहादुर शाहीले आग्रह गरेका छन् । वीरेन्द्रनगर स्थित स्कुल अफ ल क्याम्पसमा वीए एलएलवी कार्यक्रमको उद्घाटन गर्दै मुख्यमन्त्री शाहीले विश्वविद्यालय प्राज्ञिक थलो भएकोले गुण्डागर्दीलाई निषेध गरेर प्राज्ञिक संस्कृतिको विकास गर्न आग्रह गरेका हुन् ।
‘राष्ट्र निर्माण गर्ने जनशक्ति उत्पादन हुने थलोवाट ‘डन’ उत्पादन गर्न थाल्यौं भने भोलीको नेपाल कस्तो वन्ला ?’ मध्यपश्चिमाञ्चल विश्वविद्यालयमा वेला वेला हुने गरेका तालावन्दी तथा अमर्यादित गतिविधिप्रति कटाक्ष गर्दै मुख्यमन्त्री शाहीले भने ‘विश्वविद्यालयमा प्राज्ञिक शैक्षिक वातावातरण निर्माण गर्न विश्वविद्यालय प्रशासन गम्भिर वन्नुपर्छ ।’
मुख्यमन्त्री शाहीले मध्यपश्चिमाञ्चल विश्वविद्यालयलाई प्रदेश सरकारको मातहतमा ल्याई कर्णाली प्रदेशमा आवश्यक जनशक्ति निर्माण गर्ने शैक्षिक संस्थाका रुपमा विकास गर्ने सोच रहेको बताए । अहिले केन्द्र सरकारको मातहतमा भएपनि कर्णालीको विकास र समृद्धिको लागि आवश्यक जनशक्ति उत्पादनका लागि आवश्यक शैक्षिक कार्यक्रम संचालन गर्नुपर्नेमा मुख्यमन्त्री शाहीले जोड दिए ।
‘अवको १५ वर्ष भित्र कर्णालीको प्रतिव्यक्ति आय २१०० डलर पुर्याउने प्रदेश सरकारको लक्ष्य छ ।’ मुख्यमन्त्री शाहीले भने ‘त्यसको लागि विश्वविद्यालयले प्राविधिक शिक्षा तर्फ आफना शैक्षिक कार्यक्रम संचालन गर्न आवश्यक छ ।’
कानुन संकायको सुरुवातले विधिको शासन र लोकतन्त्रको सुदृढिकरणमा थप योगदान पुरयाउने विश्वास गदै मुख्यमन्त्री शाहीले दक्ष जनशक्ति विकासका लागि शुभकामना व्यक्त गरे ।
विश्वविद्यालयमा वीए एलएलवी कार्यक्रमको संचालनका लागि योगदान गर्ने डा.युवराज संग्रौलालाई सम्मान गरिएको थियो भने मुख्यमन्त्री शाहीलाई विश्वविद्यालयको समग्र विकासमा योगदान पुरयाएको भन्दै सम्मान गरिएको थियो ।
