सुर्खेत । दैलेख जिल्ला आठबीस नगरपालिका वडा नं. ६ सिंहासैनका एक युवाको भारतको हिमाचल प्रदेश अन्तर्गत मण्डिमा हत्या गरिएको अवस्थामा शव फेला परेको छ ।

दैलेख जिल्लाको आठबीस नपा ६ मा बस्ने हाल भारतको देहरादुनमा बस्दै आएका पूर्णबहादुर शाहीको गत शुक्रबार मण्डिको एक पोखरीमा प्रहरीले शव फेला पारेको हो ।

मृतकका भतिजा भुपेन्द्रबहादुर शाहीका अनुसार गत कात्तिक २२ गते उनकी बुहारी सुनकेशा शाहीले आत्महत्या गरेपछि त्यसको ६ दिनपछि दैलेख आउँदै गर्दा उनी बेपत्ता भएका थिए ।

‘घरबाट अंकलले ८ लाख भारु लिएर १३ नोभेम्बरमा नेपाल फर्केका थिए’ भुपेन्द्रले भने, ‘उहाँ त्यसलगत्तै सम्पर्क विहीन हुनु भएको थियो । प्रहरी तथा अन्य समुदायको सहयोगमा शुक्रबार मात्रै शव फेला परेको हामीलाई जानकारी प्राप्त भएको छ ।’ उनको मण्डिमा नै दाहसंस्कार गरिएको उनले जनाए ।