सुर्खेत । कर्णाली प्रदेशको राजधानी वीरेन्द्रनगरमा रहेको बजाज आधिकारिक शोरुम असिम अटो पार्टस राहत वितरण गरेको छ । वीरेन्द्रनगर–३ नयाँ मार्ग टोलका ६६ घरपरिवारलाई बिहीबार चामल, दाल नुन र तेल वितरण गरेको हो ।
नगरपालिकाको अनुमति लिएर एकद्वार प्रणालीबाट राहत वितरण गरेको वडा ३ का वडाध्यक्ष भुपेन्द्र खत्रीले जानकारी दिए । ‘हामीले अहिले एकद्धार नीतिबाट मात्रै राहत बाँडिरहेका छौं ।
सोही आधारमा असिमले हामीलाई राहत बाँडने भनेर सामान जुटाएको थियो ।’ उनले भने, ‘६६ घर धुरीलाई हामीले राहत दिएका छौं । ज्याला मजदुरी गर्ने, कोठा भाडामा बस्ने र अत्यावश्यक परेका नागरिकलाई यो राहत वितरण गरेका हौं ।’
सुर्खेत उद्योग वाणिज्य संघका महासचिव समेत रहेका सञ्चालक लक्ष्मण कंडेलले असिम अटो पार्टसले ज्वाला मजदुरी गरेर छाकटार्दै आएका परिवार र भाडामा बसेर अध्ययन गरिरहेका विद्यार्थीलाई लकडाउनमा सहयोग पुगोस् भन्ने उदेश्यले नगरपालिकाको समन्वयमा राहत वितरण गरेका जानकारी दिए ।
‘नगरपालिकासँग अनुमति लिएर सरकारको निर्णय अनुसार उहाँहरुलाई राहत बाँडिएको हो’ उनले भने, ‘७५ हजार बराबरको राहत वितरण भएको छ । कसैको घरमा पनि लकडाउनका कारण चुल्हो बल्न बन्द नहोस भनेर सहयोग गरेका हुँ ।’
