| २४ असार २०७९, शुक्रबार ०५:४१
जुम्ला — जुम्लामा चट्याङ लागेर एक युवकको मृत्यु भएको छ । तिला गाउँपालिका ९ मालापानीका १८ वर्षीय प्रेमबहादुर बुढाको मृत्यु भएको हो । जिल्ला प्रहरी कार्यालय जुम्लाका अनुसार घरबाट सिमी गोडमेल गर्न गएको समयमा चट्याङ लागेर मृत्यु भएको हो ।
प्रहरी निरीक्षक तथा सूचना अधिकारी भुवन भट्टले पानी परेको बेला रुखमुनि ओत लागिरहेको समयमा उनीमाथि चट्याङ परेको थियो । चट्याङ लागेर युवकको मृत्यु भएको खबर पाउने बित्तिकै रारालिही प्रहरी चौकीको एक टोली घटनास्थलमा पुगेको थियो ।
बिहान जिल्ला प्रहरी कार्यालय जुम्लाको मुद्दाफाँटको टोली समेत घटनास्थलतिर गएको छ । उनले भने,‘ चट्याङबाट मृत्यु भएका प्रेमको मोबाइल समेत जलेको छ । घटनास्थलमा टेलिफोन नलगाएकोले थप जानकारी आउन सकेको छैन । घटनास्थल जुम्ला सदरमुकाम खलंगा देखि ४ घण्टाको दुरीमा पर्छ ।
