काठमाडौं । पछिललो समय नेपालमा कोरोना संक्रमितहरुको संख्या फेरि बढ्न थालेका छन् । पछिल्लो २४ घण्टामा मुलुकभर एकै दिन थप ३३५ जनामा कोरोना संक्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा २ हजार ९९६ जनाको आरटी पीसीआर र एन्टिजेन विधिबाट परीक्षण गर्दा ३३५ जनामा कोरोना संक्रमण पुष्टि भएको हो ।
मन्त्रालयका अनुसार १ हजार ८८ जनाको पीसीआर विधिबाट परीक्षण गर्दा २ सय १६ जना र १ हजार ९०८ जनाको एन्टिजेन विधिबाट परीक्षण गर्दा ११९ जनामा कोरोना पुष्टि भएको हो । योसँगै नेपालमा कोरोना संक्रमितको कुल संख्या ११ लाख २४ हजार ७६७ पुगेको छ ।
योसँगै नेपालमा सक्रिय कोरोना संक्रमितहरुको संख्या २९ सय नाघेको छ । मन्त्रालयका अनुसार हाल नेपालमा २ हजार ९७१ जना कोरोनाका सक्रिय संक्रमितहरु विभिन्न आइसोलेशनमा उपचाररत छन् ।
त्यस्तै, पछिल्लो २४ घण्टामा नेपालमा थप ८६ जना संक्रमितहरु निको भएका छन् । योसँगै नेपालमा कोरोना संक्रमणमुक्त हुनेहरुको कुल संख्या ९ लाख ६८ हजार ३९४ पुगेको छ ।
