सुर्खेत । मुगु र जुम्लामा छुट्टाछुट्टै सवारी दुर्घटनामा परी दुई जनाको मृत्यु भएको छ भने सात जना घाइते भएका छन् ।आइतबार बिहान मुगुको छायानाथ रारा नगरपालिका १३, रुघामा कर्णाली नदीबाट बालुवा लोड गरी वडा नं. १४ बाम तर्फ फर्कँदै गरेको लु ४ त ७७६२ नं. को ट्याक्टर अनियन्त्रित भई पल्टिदा ट्याक्टरमा सवार ७ जना मध्ये मुगुको छायानाथ रारा नगरपालिका १३, रुघा बस्ने वर्ष ३५ का लोकेन्द्र लावडको घटना स्थलमै मृत्यु भएको छ ।
यस्तै ५ जना घाइते भएका छन् । घाइतेमध्ये एक जनाको अवस्था गम्भीर छ । ट्याक्टर चालक फरार रहेको प्रदेश प्रहरी कार्यालय सुर्खेतले जनाएको छ । घाइतेहरूको जिल्ला अस्पताल मुगुमा उपचार भइरहेको छ ।
यस्तै जुम्लाको कनकासुन्दरी गाउँपालिका १, भुलभुलेमा सुर्खेतदेखि मुगु तर्फ जाँदै गरेको लु १ ज ३७५४ नम्बरको जिप दुर्घटना हुँदा छायानाथ रारा नगरपालिका २ मुगुका अन्दाजी २४ वर्षीय दीपक तिरुवाको मृत्यु भएको छ । चालक सहित अन्य २ जना घाइते भएको प्रहरीले जनाएको छ ।
