रोल्पाको माडी खोलामा गत शुक्रबार राति भएको जिप दुर्घटनामा परी बेपत्ता भएका चालक मृत फेला परेका छन्।नुवाकोट ककनी गाउँपालिका-४ चालक ३१ वर्षीय बुद्धिबहादुर तामाङ मृत फेला परेका हुन्।
बा ७ च ५००२ नम्बरको जिप शुक्रबार राति शहीद मार्गअन्तर्गत माडी गाउँपालिका–४ सिस्ने बजार नजिकै सडकबाट माडी खोलामा खस्दा चालक तामाङ बेपत्ता भएका थिए।
घटनाको तीन दिनपछि मंगलबार खोजी कार्यमा संलग्न प्रहरी टोलीले तामाङको शव घटनास्थलदेखि करिब दुई किलो मिटर तल खोला किनारमा फेला पारेको रोल्पाका प्रमुख जिल्ला अधिकारी नवराज सापकोटाले जानकारी दिए।तामाङ काम गर्ने निर्माण कम्पनीका प्रोपाइटर सिद्धार्थ तामाङले शव बुद्धिबहादुरकै भएको पहिचान गरेको सापकोटाले उल्लेख गरे।प्रजिअ सापकोटाले शव पोष्टमर्टमका लागि जिल्ला अस्पताल लिवाङ ल्याउने तयारी भइरहेको बताए।
यसैबीच हराएका चालक तामाङ मृत फेला परेको विषयमा प्रजिअ सापकोटाले नुवाकोट क्षेत्र नम्बर–१ का प्रतिनिधिसभा सदस्य एवं माओवादी केन्द्रका पोलिट ब्युरफ सदस्य हितबहादुर तामाङलाई जानकारी गराएका छन्।
आफ्नो जिल्लाका नागरिक रोल्पामा सडक दुर्घटनामा परी बेपत्ता भएको जानकारी पाएपछि सांसद तामाङले प्रजिअ सापकोटालाई टेलिफोन गरी उनको खोजीमा तदारुकता देखाउन आग्रह गरेका थिए।‘रोल्पाका प्रमुख जिल्ला अधिकारीले मलाई फोन गरेर हराएका चालक मृत भेटिएको जानकारी गराउनुभएको छ,’ सांसद तामाङले भने।
