नेपाली क्रिकेटर ललितनारायण राजवंशीले १९औं एसियाली खेलकुद गुमाउने भएका छन् ।
चीनको हानझाओ सहरमा असोज ६ देखि १९औं एसियाली खेलकुद हुँदै छ । सोही एसियाली खेलकुदको अभ्यासका क्रममा ललित घाइते भएको नेपाल क्रिकेट संघ (क्यान) ले जनाएको छ ।
बुधबार कीर्तिपुरस्थित त्रिभुवन विश्वविद्यालयको क्रिकेट मैदानमा फिल्डिङ गर्ने क्रममा ललितको राइट क्लाभिकल (ब्युटिबोन) फ्राक्चर भएको हो । दायाँ हातको ब्युटिबोनमा चोट लागेपछि उनको बिहीबार ग्वार्कोस्थित बी एन्ड बी अस्पतालमा शल्यक्रिया भएको थियो । १९औं एसियाली खेलकुदको पुरुष क्रिकेट सेप्टेम्बर २७ देखि अक्टोबर ८ सम्म हुँदै छ ।
पाँच टेस्ट टोली श्रीलंका, भारत, पाकिस्तान, बंगलादेश र अफगानिस्तानले सीधै क्वार्टरफाइनल खेल्नेछन् । तीन समूहका विजेताले क्वार्टरफाइनलमा स्थान बनाउनेछन् ।
समूह ‘ए’ को नेपालले सेप्टेम्बर २७ मा मंगोलिया र अक्टोबर १ मा माल्दिभ्ससँग खेल्नेछ । सन् २०२२ को सुरुआतमै स्पिनर ललितको बायाँ खुट्टाको घुँडामा शल्यक्रिया गर्नुपरेको थियो । करिब एक वर्षपछि नेपाली टोलीमा फर्किएका ललितले सानदार प्रदर्शन गरेका थिए ।
