गर्मी महिनामा बढी तापक्रमका कारण हाम्रो शरीरबाट पसिना बगेर बाहिर जान्छ। पसिना बगेपछि शरीरलाई पानीको आवश्यकता पर्छ र प्यास लाग्छ। पानीको कमी भयो भने शरीरमा जलवियोजन पनि हुन सक्छ।
जाडो महिनाको तुलनामा गर्मी महिनामा खाना छोटो समयमै सड्ने, गल्ने या बिग्रिने हुन्छ। त्यसैगरी पानी पनि दूषित बन्छ। सफा पानी र ताजा खानेकुरा गर्मी मौसममा स्वस्थ र सुरक्षित खाना मानिन्छ। यसरी खाना खाएमा हाम्रो शरिरमा विभिन्न संक्रमित रोेगबाट बच्न सकिन्छ।
यो मौसममा दूषित खाना या पानीको प्रयोग भएमा झाडापखाला, हैजा, आउँ, टाइफाइड, हेपाटाइटिस एजस्ता रोग लाग्न सक्छ। तसर्थ यो मौसममा स्वस्थ रहनका लागि नियमित ताजा, स्वस्थ खानाको प्रयोग गर्नुपर्ने पोषणविद् नानीशोभा शाक्य बताउँछिन्।
उनका अनुसार यो सन्तुलित खानाका साथै विभिन्न पोेषणयुक्त र हल्का प्रकारका खाना खानाले पाचन प्रक्रियामा समेत फाइदा पुग्ने उनको सुझाव छ। यसका लागि घरबाहिर, खुला रूपमा राखिएको खानेकुरा नखाने, उमालेको या शुद्धीकरण गरेको पानी पिउने गर्नुपर्छ।
गर्मीमा शरीरलाई बढी पानीको आवश्यकता पर्ने भएकाले सकेसम्म उमालेर चिसो पारिएको पानीमा कागती, अलिकति नुन, पदिनाको जुस बनाएर पिउन सकिन्छ।
