झापामा गोरुले हानेर एक जनाको मृत्यु भएको छ । गौरादह नगरपालिका वडा नम्बर ७ जामबारी बस्ने ४८ वर्षीय कृष्ण शर्माको गोरुले हानेर मृत्यु भएको जिल्ला प्रहरी कार्यालय झापाले जनाएको छ ।

बारीमा बाँधेको गोरु सार्ने क्रममा उनलाई बिहीबार साँझ गोरुले हानेर घाइते बनाएको र दमकस्थित लाइफलाइन अस्पतालमा उपचारका क्रममा मृत्यु भएको प्रहरीले जनएको छ ।

अस्पतालका अनुसार उनको शरीरका ७ वटा करङ भाँचिएको थियो। उनलाई अस्पतालले विराटनगरको नोबेल अस्पताल रेफर गरेको थियो । गोरु समाउने क्रममा घाइते भएका शर्माका छिमेकी ४५ वर्षका रविन राजवंशीको भने उपचार भइरहेको प्रहरीले जनाएको छ ।