दैलेखको भैरवी गाउँपालिका -१ जलजलेमा सुरु गरिएको पेट्रोलियम पदार्थ अन्वेषणको कार्य ८० प्रतिशत सम्पन्न भइसकेको हो । चार हजार मिटर गहिराइसम्म ड्रिलिङ गर्नु पर्नेमा हाल सम्म तीन हजार एक सय मिटर पुगेको छ ।
०८१ वैशाख २८ गतेदेखि सुरु गरिएको ड्रिलिङको काम अहिलेसम्मको अन्वेषणको कार्यले उत्साहित बनाएको खानी तथा भूगर्भ विभागका पदाधिकारीहरूले जानकारी दिएका छन् ।
अझै यकिन भन्न सकिने अवस्था त छैन, तर जमिनमुनि २७ सय मिटरसम्म पाइप पुगेपछि साना भण्डारणहरू भेटिन सक्ने अनुमान गरिएअनुसार केही लिकेज ग्यासहरू देखिएको छ । यसले सकारात्मक संकेत गरेको अधिकारीहरू बताउँछन् । साना ग्यासका भण्डारलाई विसर्जन गर्ने र ग्यास लिकेज गर्ने मेसिन पनि सँगसँगै जडान गरिएको छ ।
पेट्रोलियम पदार्थ अन्वेषण तथा उत्खनन गर्न चीन सरकारसँग सहमति भएसँगै चीन सरकारको दुई अर्ब ४० करोडको आर्थिक तथा प्राविधिक सहयोगमा अन्वेषणको काम सुरु गरिएको थियो ।
