३० बैशाख २०७९ को स्थानीय तह, संघ र प्रदेशको निर्वाचनमा कर्णालीमा कांग्रेस, माओवादी र समाजवादी दलहरूको गठबन्धन थियो भने, एमाले एक्लै चुनाव लडेको थियो । यस उपनिर्वाचनमा कांग्रेस, माओवादी र एमाले प्रत्येक दलले आफ्नो उम्मेदवार चयन गरेको छ । नेपाली काँग्रेस र एमाले यी दुई दल गत चुनावमा पहिलो र दोस्रो दलको रुपमा रहेका थिए ।
हाल संघीय सरकार र प्रदेश सरकारमा पनि सँगै छन् । तथापि, कांग्रेस र एमाले स्थानीय तहको उपनिर्वाचनमा भने मुख्य प्रतिस्पर्धी भएका छन् । दुवै दलले पार्टीको सम्पूर्ण शक्ति लगाएर उपचुनावमा होमिने निर्णय लिएका छन् । र यो उपनिर्वाचनले दलहरूको स्पष्ट जनमत परीक्षण गर्ने मौका दिनेछ ।
उपनिर्वाचन जाजरकोटको नलगाड नगरपालिका उपप्रमुख, दैलेखको महाबु गाउँपालिका अध्यक्ष, हुम्लाको सर्केगाड गाउँपालिका उपाध्यक्ष, दैलेखको दुल्लु नगरपालिका–१३, कालीकोटको तिलागुफा नगरपालिका–४, जाजरकोटको कुशे गाउँपालिका–७, डोल्पाको त्रिपुरासुन्दरी नगरपालिका–५, र रुकुम पश्चिमको सानीभेरी गाउँपालिका–५ मा वडाध्यक्ष पदका लागि हुनेछन् ।
