पश्चिमको प्रमुख व्यापारिक केन्द्र नेपालगन्जमा बाक्लो हुस्सु तथा कुहिरोसँगै शीतलहर चलेको छ । सोमबार रातिदेखि शीतलहर चल्दा यहाँको जनजीवन प्रभावित भएको छ ।
नेपालको तराई क्षेत्रमा हरेका वर्ष शीतलहरले धेरैको ज्यान लिने गरेको र मानव स्वास्थ्यबाहेक खेतीपाती, पशुपालन, सडक यातायात, हवाइ उडान, शैक्षिक गतिविधि आदीसमेत प्रभावित हुँदै आएका छन् ।
बिहानैदेखि शीतलहर चल्दा यहाँको जनजीवन कष्टकर बनेको नेपालगन्जका अब्दुल करिमले बताए । ‘सोमबार घाम लागे पनि त्यसभन्दा अघि पनि चिसो थियो । सामान्य शीतलहर थियो,’ उनले भने, ‘मंगलबार त दिनभरि शीतलहर चल्यो ।’
शीतलहरले हिँड्डुल गर्न सकस भएको थियो । दुई पांग्रे सवारी साधनलाई अझ बढी समस्या भएको मोटरसाइकल चालक प्रवीण चौधरीले बताए । ‘मोटरसाइकल चलाउँदा शीतलहरले कपडानै भिज्यो,’ उनले भने, ‘अनुहारमा शीत जमेर चिसोसम्म भयो ।’ सामान्य गतिमा सवारी साधन चलाउँदा शीतलहरले समस्या बनाएको उनको भनाइ छ ।
शीतलहरले चिसो बढेसँगे बालबालिका, वृद्धवृद्धा, अस्पतालका बिरामी, दीर्घरोगीलाई अझ बढी प्रभावित बनाएको छ । लामो तथा छोटो दुरीमा आवातजावत गर्ने यात्रुहरु पनि प्रभावित भए । दैनिक ज्यालादारी काम गरेर खाने वर्ग पनि समस्यामा परेका छन् । कतिपय मजदुर काममा निस्किन सकेनन् भने शीतलहरलाई छिचोल्दै कति भने काममा निस्केका थिए ।