दशदिन बितिसक्दा पनि हिमालपारिको जिल्ला मनाङको जंगलमा लागेको डढेलो अझै निभेको छैन। डढेलो नियन्त्रणका लागि प्रयास गरेको भएपनि सहज नभएको स्थानीय प्रशासनले बताएको छ। डढेलोले ठूलो आकारको वनक्षेत्र नोक्सान भएको स्थानीय प्रशासनले बताएको छ।
मनाङका प्रमुख जिल्ला अधिकारी मातृका आचार्यले १० दिन अघि लागेको डढेलो अझैसम्म नियन्त्रणमा नआएको बताए। उनका अनुसार चामे गाउँपालिका–१ स्थित तिमाङ जंगलमा अघिल्लो शनिबार बेलुकी डढेलो सल्केको थियो। तिमाङ बस्तीको सिरान क्षेत्रमा आगलागी भएकोले अहिलेका लागि बस्तीमा जोखिम नरहेपनि निभाउने प्रयास सहज नभएको प्रजिअ आचार्यले जानकारी दिए।
‘सोमबार अलिअलि वर्षा भएकोले आगो नियन्त्रणमा आउने अनुमान मात्र गर्न सकिन्छ। तर, निभेको छैन। दशदिनदेखि लागेको आगो मान्छेको भरमा मात्र निभाउन सहज छैन,’ उनले भने, ‘स्थानीय र सुरक्षाकर्मीको प्रयास निरन्तर छ। तर, आगो निभाउने प्रयासले सार्थकता पाउन सकेको छैन। यो सिजनमा एकपटक पनि हिउँ नपरेपछि सुख्खा भएको क्षेत्रमा डढेलो लाग्दा हिमालपारिको क्षेत्र मनाङको वन क्षेत्रमा ठुलो क्षति भएको उनले बताए।
‘सल्लोको जंगल हो। यो सिजनमा अहिलेसम्म एकपटक पनि हिउँ परेको छैन। त्यसले गर्दा सुख्खा भएको वनमा आगो सल्कन सहज भएको हो,’ उनले भने, ‘बस्तीतिर आगो फैलन नपाओस भनेर बस्ती नजिकै अग्नीरेखा पनि बनाएका छौ। बस्ती नजिक ठूलो संख्यामा सुरक्षाकर्मी पनि तयार अवस्थामा राखेका छौं।’ उनका अनुसार करिब १० हेक्टर क्षेत्रफल वन क्षेत्र जलेको अनुमान छ।