प्रमुख जिल्ला अधिकारीको रूपमा सुर्खेत आउनुभएका जगदीश्वर उपाध्यायलाई पत्रकारहरूले विभिन्न समस्याका बारेमा जानकारी गराउँदै समाधानको लागि सुझाव दिएका छन् । जिल्ला प्रशासन कार्यालय सुर्खेतले आयोजना गरेको पत्रकार भेटघाट कार्यक्रममा सुर्खेतका पत्रकारहरूले जिल्लामा रहेका समस्या र प्रशासनको भूमिकाबारे चासो व्यक्त गर्दै सुधारका उपायहरूको सुझाव दिएका हुन् ।
कार्यक्रममा उपस्थित पत्रकारहरूले प्रमुख जिल्ला अधिकारी उपाध्यायलाई जिल्ला प्रशासन कार्यालयले गर्नुपर्ने सुधार, सुरक्षा व्यवस्थामा देखिएको व्यथिती , सवारी दुर्घटना , लागुऔषध दुव्यसनीको अवस्थाबारे चिन्ता व्यक्त गर्दै सुधारको लागि पहल गर्न आग्रह गरेका छन् ।
पत्रकार भेटघाट कार्यक्रममा बोल्दै प्रमुख जिल्ला अधिकारी जगदीश्वर उपाध्यायले पत्रकारहरूको सुझाबलाई स्वागत गर्दै उक्त समस्याहरूको समाधानका लागि प्रशासनले प्रभावकारी कदम चाल्ने प्रतिबद्धता व्यक्त गर्नुभएको छ । उहाँले सुर्खेतको शान्ति सुरक्षा, सेवा प्रवाह र विकास निर्माणका कार्यहरूलाई अझै प्रभावकारी बनाउन सञ्चार क्षेत्रको महत्वपूर्ण भूमिका रहेको बताए । प्रमुख जिल्ला अधिकारी उपाध्यायका अनुसार काम गर्नलाई कुनै असम्भव कुरा छैन, सबैको सहयोगले काम गर्न सकिन्छ तर विकास र समृद्धि सबैको साझा जिम्मेवारी भएकाले जनसमस्याहरूलाई पहिचान गरेर समस्याको समाधानका लागि सामूहिक प्रयासको आवश्यकता रहेको छ ।
