मध्यपश्चिम विश्वविद्यालय (एमयू) मा स्वतन्त्र विद्यार्थी युनियनको नयाँ नेतृत्व चयनका लागि भएको मतदानमा २८ सय ६४ मत खसेको छ ।
निर्वाचन अधिकृत खगेन्द्र अधिकारीका अनुसार कुल चार हजार ३८३ मतदाता थिए । उनले प्रत्यक्षतर्फ दुई हजार ८६४ र समानुपातिकतर्फ हजार ८६२ मत खसेको बताए ।
निर्वाचनबाट १९ सदस्यीय नयाँ कार्यसमिति चयन हुनेछ । निर्वाचनबाट अध्यक्ष, सचिव र कोषाध्यक्षसहित १० जना प्रत्यक्ष र ९ जना समानुपातिक मतबाट गरी १९ जनाको कार्यसमिति चयन हुनेछ ।
स्ववियु अध्यक्षमा यसपटक सात भ्रातृ संगठन र एक स्वतन्त्र गरी ८ जनाले उम्मेदवारी दिएका छन् । निर्वाचन अधिकृत अधिकारीका अनुसार नेविसंघबाट विवेक खड्का, अनेरास्ववियुबाट जगतजंग शाही, अखिल (क्रान्तिकारी) बाट प्रकाश विक, राष्ट्रिय प्रजातान्त्रिक विद्यार्थी सङ्गठनबाट विकल्प वली र नेपाल क्रान्तिकारी विद्यार्थी सङ्घबाट अस्मिता सुनार उम्मेदवार छन् ।
यस्तै अखिल नेपाल विद्यार्थी युनियन (समाजवादी) बाट चीनबहादुर सहकारी, अखिल नेपाल राष्ट्रिय स्वतन्त्र विद्यार्थी युनियनबाट लेलिनकुमार रेग्मी र स्वतन्त्र उम्मेदवार मिलन बिसी चुनावी मैदानमा छन् ।