हुम्लाको सर्केगाड गाउँपालिका–४ मा ट्रकको ठक्करबाट एक वृद्धाको मृत्यु भएको छ।

सोमबार दिउँसो सिमकोटतर्फ आउँदै गरेको भे १ ख ३७६४ नम्बरको ट्रकले ठक्कर दिँदा स्थानीय ७२ वर्षीया पानकला थापाको ज्यान गएको इलाका प्रहरी चौकी सर्केगाडले पुष्टि गरेको छ।

प्रहरीका अनुसार मृतक थापा सर्केगाड गाउँपालिका–४, दुल्लि गाउँकी बासिन्दा हुन्। घटनापछि आक्रोशित आफन्त र स्थानीयले कर्णाली करिडोरअन्तर्गत सर्केगाड खण्ड अवरुद्ध पारेका छन्। उक्त सडकखण्डमा आवागमन पूर्ण रूपमा ठप्प भएको बताइएको छ।

घटनाको विस्तृत अनुसन्धान भइरहेको प्रहरीले जनाएको छ। स्थानीयको आक्रोश र सडक अवरोधका कारण स्थितिलाई सामान्य बनाउन प्रहरीले पहल गरिरहेको छ।