☰ open Loading... 4 April 2025|  

प्रदूषणले बढे आँखाका बिरामी
पश्चिम नेपाल   | २१ चैत्र २०८१, शुक्रबार ०७:०८

काठमाडौं उपत्यकामा वायु प्रदूषण बढ्दै गएपछि आँखामा एलर्जीलगायत समस्या देखिन थालेको अस्पतालहरूले जनाएका छन्। बिपी कोइराला आँखा अस्पतालका अनुसार केही दिनयता अस्पतालमा आँखा चिलाउने, पोल्ने, थाकेको अनुभूति हुनेजस्ता समस्या लिएर उपचार गर्न आउने मानिसको संख्या बढेको छ। अस्पतालकी नेत्ररोग विशेषज्ञ डा. रन्जु सिटौलाले अस्पताल आउनेमध्ये १५ प्रतिशतमा प्रदूषणसँग सम्बन्धित समस्या देखिएका छन्। यो अस्पतालमा दैनिक पाँच सयजना आँखाका विरामी उपचारमा आउँछन्।

नेपाल आँखा अस्पताल त्रिपुरेश्वरले पनि एक सातादेखि वायु प्रदूषणसँग सम्बन्धित बिरामी आउन थालेको जनाएको छ। अस्पतालका अनुसार बिरामीले आँखा पोल्ने, चिलाउने, पिरो हुने, आँखा खोलेर हेर्दा असहज हुने लगायत सिकायत गरेका छन्। यो अस्पतालमा उपचारका लागि आएका कुल बिरामीमध्ये १२ प्रतिशतमा यस्तो समस्या देखिएको छ। यस अस्पतालमा दैनिक सात सय बिरामी उपचारका लागि पुग्छन्।

आँखाका बिरामीमा सामान्य, मध्यमदेखि उच्च तहसम्मको समस्या देखिएको र सोहीअनुसारको उपचार गरिररहेको बिपी कोइराला आँखा अस्पतालकी डा. सिटौलाले बताइन्। ‘कतिपय बिरामीलाई आँखा संक्रमण भएर पाक्न थालेपछि एन्टिबायोटिकसमेत दिन थालेका छौं,’ उनले भनिन्। आँखाका बिरामी चार दिनयता ह्वात्तै बढेको उनको भनाइ छ।

एलर्जीको समस्या लिएर आएका आँखाका बिरामी प्रदूषणसँग सम्बन्धित रहेको डा. सिटौलाको भनाइ छ। ‘प्रदूषणले आँखाको सतही भागमा असर पारेको छ,’ उनले भनिन्। रसायनयुक्त प्रदूषण आँखामा पसेपछि एलर्जी बढेको उनले बताइन्।

काठमाडौं उपत्यकासहित छिमेकी देशका प्रमुख सहरमा उच्च वायु प्रदूषणका कारण आँखाका बिरामी बढेको नेपाल आँखा अस्पतालका नेत्र विशेषज्ञ डा. इन्दुप्रसाद ढुंगेलले बताए।

उनका अनुसार यो मौसममा दुई प्रकारको प्रदूषणका कारण आँखामा एलर्जीजन्य समस्या बढेको हो। प्रदूषित वायुमा धुलोको दुई किसिमका कण हुन्छन्। एउटा माटोमै गएर टाँसिन्छ अर्को आँखा वा श्वासप्रश्वास नलीको माध्यमबाट शरीरभित्र प्रवेश गर्छ। जसका कारण आँखा र नाकमा एलर्जीको समस्या बढेको देखिन्छ। आँखा तथा नाकमा रासायनयुक्त कण र रुखबिरुवा फुल्दा खस्ने धुलोको कण प्रवेश गरेपछि एलर्जी हुन्छ।

चिकित्सकले पानी नपरुन्जेल वा प्रदूषण नघटुन्जेल एलर्जीलगायतका समस्या हुने भएकाले सतर्क हुन सुझाएका छन्। यस्तो वातावरणमा सकेसम्म घरबाहिर ननिस्कने, निस्कनै परेमा सवारीसाधनको प्रयोग गर्ने, आँखा छोप्ने खालको चस्मा लगाउनुपर्छ।