जिल्लाको प्रमुख दोस्रो बालीकारुपमा रहेको गहुँको उत्पादन ३ दशमलव १ प्रतिशत वृद्धि हुने प्रारम्भिक अनुमान गरिएको छ। यस वर्ष गत वर्षको तुलनामा कम्तीमा पनि ३ दशमलव १ प्रतिशत बढी उत्पादन बढ्ने कृषि ज्ञान केन्द्रले अनुमान गरेको हो ।
मलको अपर्याप्तता बिच मौसमको अनुकूलता, उन्नत जातको बीउ क्षेत्रफलको बिस्तारका कारण गहुको उत्पादन बढेको कृषि ज्ञान केन्द्रले जनाएको छ । यस वर्ष ३१ हजार ७३५ हेक्टर क्षेत्रमा लगाइएको गहुबाट १ लाख १३ हजार २६३ दशमलव ७५ मेट्रिक टन उत्पादन हुने कृषि ज्ञान केन्द्रले अनुमान गरेको छ । गत वर्ष ३१ हजार ७३५ हेक्टर क्षेत्रमा १ लाख ९ हजार ८१२ दशमलव ५ मेट्रिक टन गहुँ उत्पादन भएको थियो । यस वर्ष प्रति हेक्टर कम्तीमा पनि ३ दशमलव ६१ मेट्रिक टन गहुँ उत्पादन हुने अनुमान गरिएको छ।
गत वर्ष ३ दशमलव ५ प्रतिशत बढी उत्पादन भएको थियो । कृषि ज्ञान केन्द्रका प्रमुख भास्कर पौडेलले मलको अपर्याप्तता बाबजुद मौसमको अनुकूलता, तातो हावा समेत कम चलेको उन्नत जातको बीउका कारण गत वर्षको तुलनामा कम्तीमा पनि ३ प्रतिशत बढी उत्पादन हुने बताए । यस वर्ष खासै वर्षा नभए पनि कृषकले आफनै प्रयासले सिचाई गरेका थिए ‘ यस वर्ष रोग र कीराको प्रकोप समेत देखिएन ’ पौडेलले भने । जिल्ला कृषक महासंघका अध्यक्ष नन्द किशोर उपाध्यायले यस वर्ष मलको अभाव हुँदा पनि उत्पादन वृद्धि भएको बताए ।
कृषकले कम्बाईन थ्रेसरबाट गहुको स्याहार गरी गरी रहेका छन् । सस्तो पर्ने भएकाले अधिकांश कृषकहरूले भारतबाटै बीउ खरिद गरी ल्याएका थिए । जिल्लाका १० वटै पालिकाका पाँच पाँच स्थानबाट गहुँ उत्पादनको नमुना तथ्याङ्क लिन पठाइएको कृषि ज्ञान केन्द्रका प्रमुख पौडेलले बताए । तातो हावा पनि गुहलाई असर नहुने समयमा चलेको उनले बताए । गहुको उत्पादन बढे पछि कृषकहरू हर्षित भएका छन् । गत वर्षको तुलनामा उत्पादनसँगै मूल्य पनि बढे पछि उनीहरु खुसी भएका हुन ।
बजारमा यस बर्ष ४० देखि ४५ रुपैयाँको हाराहारीमा गहुँ बिक्री हुने गरेको कृषकहरू बताउँछन् । जिल्लामा विजया, एनएल ९७१ भृकुटी, एनएल, एचडी ३४३ गौतम लगायतका बिउँहरू लगाइएको छ । पकडी, तौलिहवा, महाराजगञ्ज, कोपवा, गजेहडा, गोटिहवा लगायतका स्थानहरूमा बढी गहुँको उत्पादन हुने गरेको छ ।
