उच्च अदालत सुर्खेतले सोती घटनाका सबै प्रतिवादीलाई जातीय भेदभाव तथा छुवाछूत मुद्दामा सफाइ दिएपछि दलित अधिकारकर्मीहरू आन्दोलनमा उत्रिएका छन्। नवराज विकसहित ६ जनाको हत्या अभियोगमा २३ जनाको जन्मकैदको फैसला भने यथावत् रहेको छ।
जातीय विभेद मुद्दामा सफाइ पाएसँगै एक नाबालक प्रतिवादी पुर्पक्षमुक्त भएका छन्। उनीमाथि हत्या अभियोग लागेको थिएन। बाँकी २३ प्रतिवादी भने हत्या र कर्तव्य ज्यान मुद्दामा दोषी ठहर भई जिल्ला अदालत रुकुम पश्चिमले २०८० पुस ५ मा सुनाएको जन्मकैदको सजाय उच्च अदालतले सदर गरेको छ।
२०७७ जेठ १० मा जाजरकोटका नवराज विक आफ्नी प्रेमिका (ठकुरी थरकी युवती) सँग विवाह गर्न चौरजहारी पुग्दा गाउँलेको कुटपिटमा उनको समूहका १८ मध्ये ६ जनाको ज्यान गएको थियो। यस घटनाले देशभर जातीय विभेद र दलित अधिकारको मुद्दालाई सतहमा ल्याएको थियो।
दलित अधिकारकर्मीहरूले उच्च अदालतको फैसलालाई जातीय विभेदको मुद्दामा न्याय नदिएको भन्दै आलोचना गरेका छन्। उनीहरूले यो निर्णयले दलित समुदायमाथिको संरचनात्मक अन्यायलाई झन् बलियो बनाउने तर्क गरेका छन्।
