अमेरिकी रक्षा विभागले इरानी हवाई आक्रमणमा कतारस्थित अमेरिकी अल उदेइद हवाई अड्डामा ‘सानो क्षति’ भएको पुष्टि गरेको छ।
अमेरिकी रक्षा विभागका प्रवक्ता सीन पार्नेलले बीबीसी फारसीको भेरिफाइ सेवालाई भने, ‘जुन २३ मा, अमेरिका र कतारी वायु रक्षा प्रणालीले इरानी क्षेप्यास्त्रहरू नष्ट गर्यो, तर एउटा इरानी ब्यालिस्टिक क्षेप्यास्त्रले अल उदेइद एयरबेसलाई लक्षित गर्यो।’
उनले भने, ‘आक्रमणबाट बेसको उपकरण र पूर्वाधारमा सामान्य क्षति पुगेको छ। यस क्रममा कोही पनि घाइते भएका छैनन्।’
अमेरिकी रक्षा विभागका प्रवक्ताले अल उदेइद एयर बेस पूर्ण रूपमा सञ्चालनमा रहेको बताएका छन्। साझेदार कतारसँगको सहकार्यमा यो एयरबेसले यस क्षेत्रमा सुरक्षा र स्थिरता प्रदान गर्ने आफ्नो अभियानलाई निरन्तरता दिन पूर्ण रूपमा सक्षम छ।
बीबीसी फारसीको तथ्य-जाँच टोलीले अल उदेइद एयरबेसमा आक्रमण हुनुभन्दा अघि र पछिको उपग्रह तस्बिरहरू हेरेको छ। तस्बिरहरूले आक्रमणमा एन्टेना कोर नष्ट भएको स्पष्ट देखाउँछ। वरपरका भवनहरूमा क्षति पुगेको छ।
इजरायलले इरानका धेरै सैन्य र आणविक अड्डाहरूलाई निशाना बनाएको थियो। त्यसपछि दुई देशबिच १२ दिन द्वन्द्व चलेको थियो।
द्वन्द्वको क्रममा, संयुक्त राज्य अमेरिका पनि संलग्न भयो र इरानका तीन आणविक केन्द्रहरू (फोर्डो, नातान्ज र इस्फहान) मा आक्रमण गर्यो। जवाफमा इरानले अल उदेइद एयर बेसमा आक्रमण गरेको थियो।