जाजरकोटको शिवालय गाउँपालिकामा बोलेरो जिप दुर्घटना हुँदा ६ जना घाइते छन् । सोमबार बिहान करिब ९ः३० बजे शिवालय गाउँपालिकाबाट छेडातर्फ जाँदै गरेको कर्णाली प्रदेश ०२–००१ च ०३५० नम्बरको बोलेरो जिप गाडी थलह–छेडा सडक खण्डको सालतडामा दुर्घटनामा परेको हो ।

दुर्घटनामा परी घाइते हुनेहरूमा चालक शिवालय–८ का २६ वर्षीय हस्त बुढा, भेरी नगरपालिका–१ की ४६ वर्षीया अबिकला राना, शिवालय–३ का ५० वर्षीय पशुपति शर्मा रहेको जिल्ला ट्राफिक प्रहरी कार्यालय जाजरकोटका प्रहरी निरीक्षक नन्दबहादुर बिष्टले खबरदृष्टिलाई जानकारी दिए । उनले चालकको निधार र टाउकोमा, रानाको दायाँ कम्मरमा र शर्माको बायाँ खुट्टा र पेटमा चोट लागेको जानकारी दिए ।

अन्य तीन जना घाइतेको भने पहिचान खुल्न बाँकी छ । जिपमा ९ जना सवारमध्ये तीन जना भने सकुशल रहेको प्रहरीले जनाएको छ । जिपमा अनियन्त्रित भई सडकबाट करिब २६ मिटर तल खोलामा खसेको थियो । घाइतेहरूको स्थानीयवासीको सहयोगमा उद्धार गरी उपचारका लागि सुर्खेतको सिम्ता गाउँपालिकास्थित जामुने बजार पठाइएको छ । दुर्घटनाको कारणबारे थप अनुसन्धान भइरहेको प्रहरीले जनाएको छ ।