अख्तियार दुरुपयोग अनुसन्धान आयोगले घुस लिएको आरोपमा मालपोत कार्यालय धुलिखेलमा कार्यरत खरिदार ज्ञानेन्द्र प्रसाद भण्डारीविरुद्ध विशेष अदालतमा आरोपपत्र दायर गरेको छ।

अख्तियार दुरुपयोग अनुसन्धान आयोग, टङ्गालबाट २०८२ असोज २८ गते जारी गरिएको प्रेस विज्ञप्तिअनुसार, खरिदार भण्डारीले साबिक दोलालघाट गा.वि.स. वडा नं. ७ मा रहेको फिल्ड बुकमा दर्ता छुट भएको जग्गा हकवालाको नाममा दर्ता गरिदिने प्रयोजनका लागि सेवाग्राहीसँग घुस माग गरेको सूचना र उजुरी परेको थियो।

सोही सूचनाका आधारमा खटिएको टोलीले खरिदार भण्डारीलाई सेवाग्राहीसँग रु. २ लाख रुपैयाँ घुस/रिसवत लिइसकेको अवस्थामा नियन्त्रणमा लिएको प्रवक्ता राजेन्द्र कुमार पौडेलले जानकारी दिए ।

अनुसन्धानका क्रममा उनले जग्गा छुट दर्ता गर्ने प्रयोजनका लागि सेवाग्राहीसँग २ लाख रुपैयाँ घुस लिएको स्थापित भएको आयोगले जनाएको छ।

अख्तियारले खरिदार ज्ञानेन्द्र प्रसाद भण्डारीविरुद्ध भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुरमा बिगो रु. २ लाख कायम गरी सोही ऐनबमोजिम कैद र बिगो बमोजिम जरिवाना सजाय हुन मागदाबी लिई आज विशेष अदालत, काठमाडौँमा आरोपपत्र दायर गरेको छ।