ऋणकै छ त्रास के आउँथ्यो दशैँ ?
झुपडीको बास के आउँथ्यो दशैँ ?

हुनेखानेलाई पो आउँछ त चाडबाड,
परियो दास के आउँथ्यो दशैँ ?

दिनभरी नङ्ग्रा खियाउनु पर्छ ,
जुटाउन गास के आउँथ्यो दशैँ ?

जुवा तासको नशा चढेपछी बालाई,
हुन सक्छ बनबास के आउँथ्यो दशैँ ?

यो अभावले गर्दा कहिल्यै लागेन,
चाडबाड नि खास, के आउँथ्यो दशैँ ?

रेमिट्यान्स कुरी बस्याथे छिमेकी,
फर्कियो लास के आउँथ्यो दशैँ ?

(२०७३ को बडादशैको हार्दिक मंगलमय शुभकामना सहित)