वीरेन्द्रनगरको आवास क्षेत्रमा रहेको मध्यपश्चिमाञ्चल विश्वविद्यालयको कार्यालय र उपकुलपतिको निवासमा विद्यार्थीले मंगलबार दिउसो ताडफोड गरेका छन् ।
आन्दोलनरत इन्जिनियरिङ संकायका विद्यार्थी र विश्वविद्यालयका पदाधिकारी विच वार्ता चलिरहेको अवस्थामा एक्काशी विद्यार्थीले तोडफोड गरेका हुन् ।
विश्वविद्यालयको कार्यालय र उपकुलपति निवासमा रहेका कुर्सी, टेवल र उपकुलपति चढ्ने गाडीमा तोडफोड गरेको विश्वविद्यालयका इन्जिनियरिङ संकायका निमित्त डिन अनन्त घिमिरेले जानकारी दिए ।
‘वार्ता सकारात्मक रुपमा चलिरहेको थियो । एक्काशी केही उच्छृङ्खल विद्यार्थीले टेवल र कुर्सी उचालेर तोडफोड गरे’ डिन घिमिरेले भने । केही दिन अघिबाट इन्जिनियरिङ संकायका विद्यार्थीले सेमेस्टर परीक्षामा ५० प्रतिशत अनुर्तिण विद्यार्थीलाई फेरि परीक्षामा सामेल हुन नपाउने निर्णय तत्काल खारेज गर्नुपर्ने, इन्जिनियरिङ संकायमा अनुभवि र पूर्णकालिन शिक्षकको व्यवस्था गर्नुपर्ने, प्रत्यक वर्ष १० प्रतिशतका दरले वृद्धि भइरहेको शैक्षिक शुल्क खारेज गर्नुपर्ने लगायतका माग अघि सारेका थिए ।
तर इन्जिनियरिङ संकायका निमित्त डिन घिमिरेले जायज माग सम्बोधन गर्न विश्वविद्यालय सकरात्मक रहेको र वार्ताबाट समाधान खोजिरहेको अवस्थामा तोडफोड गर्नु दुःखद् भएको प्रतिक्रिया दिए ।
‘विद्यार्थीका मागहरु विश्वविद्यालयले पूरा गरिसकेको र केही मागका सम्वन्धमा मंगलवार वार्ता बोलाइएको थियो’ घिमिरेले थपे,–‘सहज तरिकारले छलफल चलिरहेका बेला विद्यार्थीहरु तोडफोडमा उत्रिनु गलत कार्य हो ।’
वार्तामा विश्वविद्यालयका क्याम्पस प्रमुख उपेन्द्र हमाल, सहायक क्पाम्पस प्रमुख सोनालाल यादव, इन्जिनियङ संकायका निमित्त डिन घिमिरे र आन्दोलनरत इन्जिनियरिङ संकायका १० जना विद्यार्थीको उपस्थिती थियो ।
वार्तामा सहभागी सवै विद्यार्थीले तोडफोड नगरेको र केही विद्यार्थीले मात्रै उदण्ड मच्चाएको विश्वविद्यालयले जनाएको छ । तोडफोडपछि विद्यार्थीहरुले विश्वविद्यालयमा लगाएको ताला खोलेर भागेको घिमिरेको भनाई छ ।
विश्वविद्यालयले घटनाको छानविन गर्ने र दोषि विद्यार्थीलाई कारवाही गरिने जनाएको छ । विश्वविद्यालय कार्यालयको सुरक्षामा प्रहरी खटाइएको छ ।
