सदरमुकाममा रहेका सबै सरकारी तथा गैर सरकारी कार्यालयमा कार्यालयले प्रदान गरेको सेवा सुविधा प्रति गुनासो तथा सुझाव लिन सुझाव पेटीका राखिएका छन् । कार्यालयको मुल प्रवेशद्धार नजिकै राखिने सुझाव पेटिका जोकोहीले पनि कार्यालय छिर्ने बेलामा सजिलै देख्न सक्छन् । कार्यालयवाट सेवा लिँदा सबै सेवाग्राहीहरु पक्कै सन्तुष्ट हुँदैनन् । सेवामा सुधारका लागि सेवाग्राहीकै सल्लाह, सुझाब र गुनासो लिन राखिने त्यस्ता सुझाब पेटिका जुम्लामा भने प्रयोगवीहिन बनेका छन् ।

तर जुम्लाका सरकारी कार्यालयहरुमा राखिएका त्यस्ता सुझाब पेटिकामा बर्षौदेखि सुझाब तथा गुनासोहरु पर्न सकेका छैनन् । जिल्ला प्रशासन कार्यालयमा राखिएको सुझाब पेटिकाहोस् वा जिल्ला विकास समिति जुम्लानै जिल्लाका कुनैपनि सरकारी कार्यालयमा राखिएका सुझाब पेटिमा एउटै पनि सुझाब परेको पाइदैन ।

उजुरी दिनु परे सेवाग्राहीहरु सिधै कार्यालयमा नै पुग्ने गरेका छन् । भने सुझाब पेटिका तिर कसैले ध्यान नै दिँदैनन् । दिनहुँ दर्जनको हाराहारीमा उजुरी आउने जिल्ला प्रहरी कार्यालयको समेत सुझाब पेटिका रित्तो भेटिन्छ ।

सुशासन व्यवस्थापन ऐन २०६४ अनुसार प्रत्येक कार्यालयमा सुझाब पेटिका राखिएको हो । सेवाग्राही नागरिकप्रति उत्तरदायी बन्न हरेक सरकारी कार्यालयमा उजुरी पेटिका राखिए पनि ती पेटिकामा सधै ताल्चा लगाइएका छन् । नेपाल खाद्य संस्थान शाखा कार्यालय, जिल्ला स्वास्थ्य कार्यालय, जिल्ला शिक्षा कार्यालय, खानेपानि र जिल्ला मालपोत कार्यालय जुम्ला लगाएत जिल्लाका प्रमुख कार्यालयमा राखिएका उजुरी पेटिकामा माकुराको जालोले घेरिएका छन् ।

कार्यालय प्रमुख तथा कर्मचारीसँग सीधै गुनासो राख्न नसक्ने सेवाग्राहीका लागि राखिएका उजुरी पेटिका कार्यालयका भित्तामा रित्तो झुन्डिएका छन् । सेवाग्राहीको निकै भीडभाड हुने प्रशासन, जिल्ला विकास समिति, शिक्षा, कृषि, पशु, जनस्वास्थ्य, निर्वाचन, अदालत, प्रहरी लगायत सबै कार्यालयमा सुझाव पेटिका छन् । तर सुझाव नपरेपछि पेटिकाको कुनै वास्ता गरिएको छैन ।

केही पेटिकाहरू पानीले भिजेर कुहिन थालेका छन् भने केहीमा धमिरा लागेको छ । साँचोमा समेत खिया लागेको छ । जिल्लाका सबै कार्यालयमा ‘नागरिक वडापत्र र सुझाव पेटिका सुशासनका लागि राखिएका हुन् । सबैले देख्ने ठाउँमा उजुरी पेटिका नभएको र यसबारे सेगाग्राहीलाई थाहा नभएर पनि यसको उपयोग हुन नसकेको हो कि भन्ने बिषयमा पनि चर्चा चलिरहेको छ । २÷३ बर्षअघि सरकारी कार्यालयले महिनैपिच्छे पेटिका खोल्ने गर्थे ।

तर हिंजोआज गुनासो आउन छाडेपछि पेटिका पनि खोल्न छाडिएको कार्यालयका कर्मचारीहरूले बताएका छन् । ‘हिंजोआज टेलिफोन तथा इन्टरनेटको सुविधा भएपछि गुनसोहरू पेटिकामा भन्दा फोनमा आउन थालेका छन् । आफ्नो गुनासो कार्यालय प्रमुखलाई भेटेर राख्न सक्ने क्षमताको विकास सेवाग्राहीमा भएकाले उजुरी पेटिकाको महत्त्व घटदै गएको पाइएको छ ।