बैतडी । बैतडीको दोगडाकेदार गाउँपालिकाका किसानले पालेका गाई अज्ञात रोगका कारण मर्न थालेका छन् । दोगडाकेदार–३ श्रीकोट खिरेगाउँमा एक हप्ताको अवधिमा पाँच गाई मरेका हुन् ।
श्रीकोटका स्थानीय बासिन्दा विनोद भाटका अनुसार गाईले मुखबाट ¥याल फाल्ने, शरीर फुल्ने, मलमूत्र बन्द हुने जस्ता लक्षण देखिने गरेका छन् । उनले भने “यस्तो लक्षण देखिएको २४ घन्टाभित्रै गाई मरेका छन् ।”
जिल्लाको दोगडाकेदार–३ तथा साविकको श्रीकोट–२ का शङ्कर भट्ट, अर्जुन भाट, बलदेव भट्ट, कलसे विष्ट र देवेन्दसिंह भाटले पालेका एक÷एक गाई मरेका बताइएको छ ।
जिल्ला पशुसेवा कार्यालय पाटन बैतडीका पशु विकास अधिकृत देवीदत्त भट्टले दोगडाकेदार–३ श्रीकोटका किसानले पालेका गाई मरेको बारेमा कुनै पनि जानकारी नआएको बताए । उनले भने “गाई के कारणले मरेका हुन् भन्नेबारे पशु चिकित्सक पठाएर रोग पत्ता लगाउँछौँ ।”
अज्ञात रोगका कारण यसरी गाई मर्न थालेपछि किसान चिन्तित बनेका छन् । यसअघि गत वर्ष पनि यस्तै लक्षणका कारण बैतडीमा दुई दर्जनभन्दा बढी किसानले पालेका ३० भन्दा बढी भैँसी मरेका थिए ।
