जुम्ला । आर्थिक वर्ष सकिनै लाग्दा गोप्य तरिकाले विकास निर्माण कार्यलाई अधि बढाएको भन्दै नेपाल पत्रकार महासङ्घ जिल्ला शाखा जुम्लाले जिल्ला समन्वय समितिको कार्यालय जुम्लाको ध्यानाकर्षण गरेको छ । महासङ्घ जुम्लाका अध्यक्ष बरमबहादुर महत नेतृत्वको जुम्लाका सम्पूर्ण पत्रकारको टोलीले स्थानीय विकास अधिकारी हरिनारायण बेल्बासेको ध्यानाकर्षण गराएको हो ।
स्थानीय विकास अधिकारी बेल्बासेले टेन्डर गर्न सकिने करोडौँका योजनालाई टुक्र्याएको, मनोमानी ढङ्गबाट कोटेसन वितरण गरेको, जुम्लाका राजनीतिक दल, नागरिक समाज र पत्रकारलाई बाइपास गरेर थाहै नदिई चारजना सांसदलाई अनुगमनमा डुलाउने काम गरेको आरोप सहितको ध्यानाकर्षण पत्र बुझाएको हो ।
प्रेसजगत्लाई विकासका महत्वपूर्ण योजना तथा सवालमा गुम्राहमा पारेर अघि बढाइएका गतिविधिबाट सुसूचित हुने नागरिक अधिकार कुण्ठित गरिएकाले बाध्य भएर ध्यानाकर्षण गराउनु परेको अध्यक्ष महतले बताए ।
स्थानीय विकास अधिकारी हरिनारायण बेल्बासेले सांसदहरुले निर्वाचन क्षेत्र पूर्वाधार विशेष कार्यक्रमबाट विनियोजित बजेटका योजनाको अनुगमन गर्न भनेपछि त्यसको सहजीकरण गरेको बताए ।
