सुर्खेत । ग्याँसको चुल्हो ल्याउने विषयमा विवाद हुँदा श्रीमानले लाठीले हानेर श्रीमतीको मृत्यु भएको छ । जिल्ला प्रहरी कार्यालयका अनुसार वीरेन्द्रनगर–२ कोलडाँडाका ४६ वर्षीय बलबहादुर बुढाले ३१ वर्षीय श्रीमती पद्मा बुढाको हत्या गरेका हुन् ।
जिल्ला प्रहरी कार्यालय सुर्खेतका डिएसपी निशान थापाका अनुसार ग्यासको चुल्हो किन्ने विषयमा विवाद हुँदा शुक्रबार साँझ पाँच बजेतिर उनीहरुबीच विवाद भएको थियो । ‘दुवै रक्सीले मात्तेका थिए, विवाद बढ्दै जाँदा बदहादुरले लाठ्ठीले पद्माको टाउकोमा हाने’ उनले भने,–‘बेहोस् भएर ढलेकी प्दमालाई उपचारका लागि क्षेत्रीय अस्पताल लैजाने क्रममा बाटोमै मृत्यु भयो ।’
प्रहरीले श्रीमतीको हत्या गर्ने बलबहादुरलाई पक्राउ गरेको छ । उनी बिरामी रहेकाले क्षेत्रीय अस्पतालमा उपचार भइरहेको डिएसपी थापाले जानकारी दिए । ‘अदालतबाट म्याद थप गरेर यस विषयमा थप अनुसन्धान गरिरहेको जानकारी दिएका उनले केही दिनभित्रै अनुसन्धान प्रक्रिया शुरु गरेर अदालतामा पेश गर्ने उल्लेख गरे ।
