सुर्खेत । मध्यपश्चिमाञ्चल विश्वविद्यलयका रजिष्टार महेन्द्रकुमार मल्ल चढ्ने गाडी माथि ढुंगा प्रहार गरिएको छ । विश्वविद्यालयको आवस क्षेत्र नजिकै रहेको विस्तारित कार्यालयमा पार्किङ्ग गरेको गाडी माथि आन्दोलनरत असन्तुष्ट विद्यार्थीहरुले पौन २ बजे ढुंगाप्रहर गरेको विश्वविद्यालय स्रोतले घटनाको पुष्टी गरेको छ ।
नेपाल विद्यार्थी संघका केन्द्रीय सदस्य अनिल शाहीको नेतृत्वमा विस्तारित कार्यालयमा पुगेको टोलीले रजिष्टार चढ्ने बा १७ च ४२५५ नम्बरको गाडीमाथि ढुंगा प्रहार गरेको विश्वविद्यालयले स्रोतले जानकारी दियो । आन्दोलनरत विद्यार्थीले गाडीको अगाडीको सीसा फुटाएका छन् । यता विभिन्न माग राख्दै आन्दोलनरत विश्वविद्यालयका आठ विद्यार्थी संगठनहरुले भण्डाफोर कार्यक्रम अन्तरगत उपकुलपतिको गाडी तोडफोड गरेको प्रतिक्रिया दिएका छन् ।
आन्दोलनरत तथा नेविसंघका केन्द्रीय सदस्य शाहीले ८ वटै विद्यार्थी संगठनहरुको अगुवाइमा गाडीमाथि ढुंगा प्रहार गरेको जानकारी दिए । ‘मेरो मात्रै नेतृत्व हैन, हामी सवै विद्यार्थी संघ संगठन विस्तारित कार्यालय पुगेका थियौं’ शाहीले भने,–‘यो आन्दोलनको सुरुवाती चरण हो, अव भोलीका दिनमा थप आन्दोलन सशक्त बनाउने तयारीमा जुटेकाछौं ।’
एक सातादेखी विश्वविद्यालयका विद्यार्थीहरूले विश्वविद्यालयलाइ व्यवस्थित र साझा शैक्षिक संस्थाको रुपमा सञ्चालन गरिनुपर्ने, आंगिकरुपमा सम्बन्धन दिने भनिएका क्याम्पसहरुलाई सम्बन्धन दिई तत्काल सञ्चालनमा ल्याउनुपर्ने लगायतका माग अघि सारेर अान्दाेलनरत गरिरहेका छन् ।
