दोक्लममा सेना लगाएर सडक निर्माणमा तिव्रता

काठमाडाैं । दुई महिना अघि दोक्लम क्षेत्रमा चीन र भारतीय सेना आमने सामने हुँदा युद्ध भड्कने खतरा पैदा भएर साम्य हुन नपाउँदै यो विवाद फेरी बढ्ने देखिएको छ ।

चीन र भूटानको सिमा दोक्लममा आफ्नो सेना घुसाएर विवाद निम्त्याएको भारतले रातारात सेना फिर्ता बोलाएर आफुले झिकेको विवाद आफैं हटेर समाधान गरेपनि विवादको तुसभने बाँकी नै रहेको देखिएको छ ।

चीनले दुई देशीय सिमामा रहेका भारतीय सेना नहटाए नचिताएको अवस्था भोग्नुपर्ने चेतावनी जारि गर्दै दबाव दिएपछि भारतीय सेना हटेको सो क्षेत्रमा अहिले चीनले सेना लगाएर सडक खन्न थालेको छ ।

चीनले दोक्लम पठार क्षेत्रको उसको भूभागमा भूटानले समेत दाबी गरेको भनिएको भूभागमा फेरि सडक बनाउन थालेको भारतीय अधिकारीहरूले दाबी गरेका छन् ।

अहिले सडक बनाउनमा संलग्न कामदारलाई ५ सय बढी चिनियाँ सैनिक जवानले सुरक्षा दिएको बताइएको छ । चीनले दोक्लममा बिस्तारै सैनिकहरूको संख्या बढाउँदै लगेको र सैनिक बख्तरबन्धगाडीहरु समेत तैनाथी यथावत राखेको भारतीय दाबी छ ।

विवादीत भनिएको सो क्षेत्रमा चीनले १२ किलोमिटर सडक बनाइसकेको र उच्च पहाडी क्षेत्रमा थप सडक विस्तार गरिरहेको भारतीय सेनाको हवालादिंदै भारतीय मिडियाहरुले उल्लेख गरेका छन् ।

यसैबिच दोक्लम विवादका क्रममा भारतजान चाहने चीनियाँलाई असुरक्षित भएको भन्दै भ्रमणमा नजान ‘ट्राभल एड्भाजरी’ जारी गरेको चीनले यसलाई कायम राख्दै थप सुरक्षा सतर्कता थपेको छ ।

‘ट्राभल एड्भाजरी’ जारी गर्दै चीनले आफ्ना नागरिकलाई नेपाल र भारतको सीमा क्षेत्रको यात्रा जोखिमपूर्ण हुनसक्ने भन्दै भारतीय सुरक्षाकर्मीबाट टाढा रहन भनेको छ । उसले भारतीय सुरक्षा निकायको भौतिक पूर्वाधार र सवारीको फोटो नखिच्न पनि भनेको छ ।

‘सीमा क्षेत्रका बजार भ्रमण नगर्नु र भुक्किएर एक देशबाट अर्को देशमा प्रवेश नगर्नू ।’ भन्दै चीनले नेपाल घुम्न जाने आफ्ना नागरिकलाई रातको समयमा बाहिर नजान, प्राकृतिक विपत्ति, चोरी, यात्रामा विवाद लगायतका समस्या भएमा नेपाल प्रहरी र काठमाडौंस्थित चिनियाँ दूतावासमा सम्पर्क गर्न अनुरोध गरेको छ ।