फ्रेन्च क्लब पेरिस सेन्ट जर्मेन (पीएसजी) का प्रशिक्षक थोमस टुसिलले आफ्ना स्टार खेलाडी नेमारको आलोचना गरेका छन्। समर्थकसँग गरेको विवादका कारण उनले नेमारमाथि टिप्पणी गरेका हुन्।

फ्रेन्च कप फुटबलको फाइनलमा पीएसजी रेनसँग टाइब्रेकरमा ६–५ ले पराजित भएपछि नेमारले समर्थकसँग विवाद गरेका थिए। पीएसजीका खेलाडी मैदानबाट बाहिरिँदै गरेको बेला एक दर्शकले आफ्नो मोबाइलबाट भिडियो खिचिरहेका थिए।

त्यो देखेका नेमार भिडियो खिच्ने दर्शकसँग विवाद गर्न पुगेका थिए। ‘खेलाडीले दर्शकसँग झगडा गर्न मिल्दैन,’ प्रशिक्षक टुसिलले भने, ‘कुनै पनि हालतमा झगडा गर्नु हुँदैन।’

हारको पीडा र जीतको खुशीमा खेलाडीले दर्शकप्रति सम्मान देखाउनुपर्ने उनको भनाइ छ। ‘हारपछि सबैलाई गाह्रो हुन्छ,’ उनले भने, ‘तर, पराजय स्वीकार गर्नुपर्छ।’