काठमाडौँ । नेकपा एमालेले विवाद समाधान कार्यदलले प्रस्तुत गरेको १० बुँदे प्रस्ताव शीघ्र कार्यान्वयनमा लैजाने निर्णय गरेको छ । ललितपुरको च्यासलस्थित तुल्सीलाल स्मृति भवनमा आज बसेको एमाले केन्द्रिय कमिटी बैठकले जनवर्गीय सङ्गठनहरूलाई २०७५ जेठ २ अघिको अवस्थाबाट क्रियाशील बनाउन चार सदस्यीय कार्यदल समेत गठन गरेको छ ।
एमाले महासचिव ईश्वर पोखरेल नेतृत्वको कार्यदलमा नेताहरू विष्णु पौडेल, गोकर्ण विष्ट र टोपबहादुर रायमाझी रहनुभएको सचिव प्रदीप ज्ञवालीले जानकारी दिनुभयो । एमाले केन्द्रिय कमिटी बैठकले पार्टीको दशौं महाधिवेशन आगामी मङ्सिर १०, ११ र १२ गते गर्ने निर्णयलाई अनुमोदन गरेको सचिव ज्ञवालीले जानकारी दिनुभयो ।
केन्द्रिय कमिटी बैठकले विधान महाधिवेशन असोज ४, ५ र ६ गते गर्ने र स्थानीय तहमा कात्तिक ६ गते वडा र ९ गते पालिका अधिवेशन गर्ने स्थायी कमिटीको निर्णयलाई समेत अनुमोदन गरेको छ ।
बैठकमा अध्यक्ष केपी शर्मा ओलीले पार्टी एकताका पक्षमा उभिने नेताहरूलाई स्वागत गर्नुभएको सचिव ज्ञवालीले बताउनुभयो । एमाले बैठकले निर्वाचन आयोगबाट केही विवादास्पद निर्णय भएको भन्दै त्यसको कानून संवत् ढङ्गले अगाडि बढ्ने जनाउँदै सरकारले ल्याएको दल विभाजन सम्बन्धी अध्यादेश संविधान विपरीत भएको जनाएको छ ।
