सल्यान — सल्यानमा मोटरसाइकल दुर्घटनामा एक वृद्धको मृत्यु भएको छ । जिल्लाको छत्रेश्वरी गाउँपालिका २ दहखोला घर भएका ६० वर्षीय टुल्कबहादुर खत्रीको मृत्यु भएको हो ।
छत्रेश्वरी गाउँपालिका २ लाखुरीबोट नजिकै सडक खण्डमा स्थानीय २४ वर्षीय डिल्ली ओलीले चलाएको रा २ प ४५९२ नम्बरको मोटरसाइकलमा सवार खत्रीको उपचारका क्रममा मेडिकल कलेज कोहलपुरमा मृत्यु भएको जिल्ला प्रहरी कार्यालय सल्यानका प्रहरी नायव उपरीक्षक सुमीत खड्काले बताए । उनका अनुसार कच्ची सडक भएकाले मोटरसाइकल अनियन्त्रित भएर दुर्घटनामा परेको थियो ।
दुर्घटनामा परेको मोटरसाइकल सडकदेखि दुई मिटर तल खस्दा खत्री गम्भीर घाइते भएका थिए । गम्भीर घाइते भएका खत्रीलाई आइतबार नै उपचारका लागि कोहलपुर मेडिकल कलेज लगिएको थियो । खत्रीको सोमबार बिहान उपचारका क्रममा मृत्यु भएको उनले जानकारी दिए । मोटरसाइकल चालक डिल्ली ओलीलाई नियन्त्रणमा लिइएको खड्काको भनाइ छ ।
