एसियाली खेलकुद अन्तर्गतको पुरुष क्रिकेटको खेल तालिका परिवर्तन भएको छ। बहराईनले प्रतियोगिताबाट नाम फिर्ता लिएसँगै खेल तालिका परिवर्तन भएको हो।
प्रतियोगितामा अब नेपालले माल्दिभ्स र मङ्गोलियालाई समूह चरणको प्रतिद्वन्दीको रुपमा पाएको छ।
नयाँ खेलतालिकामा नेपाल समूह ‘ए’ मा रहेको छ। यसअघि नेपालले जापान र कम्बोडियासँग खेल्ने तय भएको थियो। टी–ट्वान्टी फर्म्याटमा हुने खेलमा नेपाल टी–ट्वान्टी आई वरियतामा १७ औं स्थानमा छ भने माल्दिभ्स ८० औं र मङ्गोलिया वरियताभित्रै छैन।
समूह ‘बी’ मा कम्बोडिया, जापान र हङकङ रहेको छ भने समूह ‘सी’ मलेसिया, सिङ्गापुर र थाईल्यान्ड रहेका छन्।
यसअघि समूह चरण खेल्ने तय भएको पूर्ण सदस्य राष्ट्र अफगानिस्तान सिधै क्वाटरफाइनलमा प्रवेश गरेको छ ।
समूह चरणमा शीर्ष स्थानमा रहने टोली क्वाटरफाइनलमा स्थान बनाउने छ । भारत, पाकिस्तान, बङ्गलादेश र श्रीलङ्काले सिधा क्वाटरफाइनलमा स्थान बनाएका छन् ।
नेपालले २७ सेप्टेम्बर (असोज १०) मा मङ्गोलियासँग, १ अक्टोबर (असोज १४) मा माल्दिभ्ससँग खेल्ने छ।
प्रतियोगिताको क्वाटरफाइनलका खेलहरू ३ र ४ अक्टुबर (१६–१७ असोज) मा हुनेछन् भने ६ अक्टोबर (१९ असोज) मा सेमिफाइनल र ७ अक्टोबर (२० असोज) मा फाइनल खेल हुने कार्यतालिका रहेको छ।
