☰ open Loading... 14 July 2024|  

चिसोले रित्तिंदै हिमाली बस्ती
पश्चिम नेपाल   | ३० मंसिर २०८०, शनिबार ०७:४६

चिसोले हिमाली जिल्ला मनाङ र मुस्ताङका माथिल्ला भेगका बस्ती रित्तिँदै गएका छन्। चिसो छल्न गाउँलेहरू धमाधम सहरतिर झरिरहेको स्थानीयले बताएका छन्।

तापक्रम निकै नै ओरालो लाग्दै जाँदा खोलानालाको पानीसमेत जम्न थालेको छ। चिसोले जमेपछि पाइपको धारामा पानी आउन छाडेको छ। हिमाली जिल्ला मनाङमा रातिको तापक्रम माइनस १७ डिग्रीसम्म ओर्लेको छ।

मनाङ सदरमुकाम चामेसमेत यतिबेला सुनसान बन्दै गएको छ। मनाङका प्रमुख जिल्ला अधिकारी सुवासकुमार लामिछानेका अनुसार अहिले सदरमुकाम चामेको तापक्रम रातिको समयमा माइनस १७ डिग्रीमा झर्ने गरेको छ। दिउँसोमा भने तापक्रम शून्यमा झरेको छ।

उनका अनुसार मुहानमा जमेपछि पाइपबाट पानी आउनै छाडेको छ। ‘मंसिरको तेस्रो साता हिउँ परेपछि चिसो बढेको हो। पानी पनि जम्न थालेको हो। मुहानमै पानी जमेपछि पाइपबाट आउनै पाउँदैन,’ लामिछानेले भने, ‘यो बेला हिउँ त परेको छैन। तर चिसो भने अधिक नै छ। पानी जमेपछि बरफ नै पगाल्नुपर्ने अवस्था आउँछ। दिनमा घाम लागेका बेला पानी केही आउँछ।’

अबका चार महिना हिमाली जिल्लाको बसोबास कष्टकर बन्ने उनले बताए।

प्रजिअ लामिछानेका अनुसार चिसोका कारण ठाउँठाउँको पानी जमेकाले गाडी चल्न पनि मुस्किल हुने गरेको छ। बरफमा चिप्लिएर गाडी उक्लिन पनि सक्ने अवस्था नरहेको उनले बताए। ‘जनजीवन प्रभावित भएको छ। चिसोका कारण सदरमुकाम नै सुनसान बनेको छ,’ उनले भने, ‘सदरमुकामका स्थानीय पनि बसाइ सरेर सहरतिर झर्न थालेका छन्।’