अख्तियार दुरुपयोग अनुसन्धान आयोगले सघन सहरी तथा भवन निर्माण कार्यालय राजविराजका तत्कालीन आयोजना प्रमुख सिनियर डिभिजनल इन्जिनियर सचिन्द्रकुमार देवसहित चारजनाविरुद्ध भ्रष्टाचार मुद्दा दायर गरेको छ।
अख्तियार दुरुपयोग अनुसन्धान आयोगले देवसहित इन्जिनियर मदन राय, सवइन्जिनियर सरोजकुमार यादव र गुन्जा कन्स्ट्रक्सनका प्रोपराइटर गोविन्दप्रसाद मण्डलविरुद्ध विशेष अदालतमा भ्रष्टाचार मुद्दा दायर गरेको हो।
सप्तरीको हनुमाननगर कंकालिनी नगरपालिका– ४ मधुवापुरअन्तर्गत सहरी विकास, राजविराजद्वारा मधुवापुर वडा कार्यालयदेखि अर्जी टोलसम्म लगभग तीन सय मिटर दूरीमा कालोपत्रे बाटो निर्माण गर्ने क्रममा भ्रष्टाचार गरेको भन्दै आयोगले मंगलबार चारै जनालाई प्रतिवादी बनाएर भ्रष्टाचार मुद्दा दायर गरेको हो।
गरिएको काम कम, सम्पन्न धेरैको प्राविधिक मूल्याङ्कनसहितको नापी किताब, ठेक्का बिल, कार्य स्वीकृति प्रतिवेदनसमेत प्रमाणित गरेर ठेकेदारलाई तीन लाख ४७ हजार रुपैयाँ बढी भुक्तानी दिइएको पाइएपछि उनीहरुविरुद्ध भ्रष्टाचारको मुद्दा लागेको हो।
अख्तियारले भ्रष्टाचार निवारण ऐन, २०५९ को दफा ८ बमोजिम तीन लाख ४७ हजार रुपैयाँ बिगो मागदाबीसहित कैद र जरिवानाको माग गर्दै उनीहरुविरुद्ध विशेष अदालत, काठमाडौंमा मुद्दा दायर गरेको हो।
