पश्चिम दैलेखकाे ठाटीकाँध गाउँपालिका-१, सिराडी ग्वालिपिन्नमा गएराति तीन महिनाकाे शिशु बेपत्ता भएकाे छ।
गएराति ९ बजेतिर स्थानीय बमबहादुर बुढाकी छाेरी श्रीया बुढालाई अपहरणशैलीमा बेपत्ता पारिएकाे हाे ।
उक्त शिशु तीन महिना अगाडि जन्मिएकाे हाे ।
बमबहादुरका दाजु दीपक बुढाका अनुसार घरमा सबै सुकिसकेका थिए ।
घर पछाडीकाे रुखमा राखेकाे खरमा आगाे लाग्याे । उक्त कुरा सुरुमा कसैलाई पत्तै थिएन ।
’माथिल्लाे घरका मान्छेले देखेर खबर गरे,’ उनी भन्छन्, ‘त्यसपछि बच्चाकाे आमा, बुबादेखि सबै जना आगाे निभाउन गए ।’
लगत्तै घरमा आउँदा बच्चा नभएकाे उनले बताए। उनका बुझाइमा बच्चालाई लिनमा लागि कुनै समुहले खरमा आगाे लगाएकाे र निभाउन गएकाे माैकामा बच्चा उठाएर भागेकाे शंका छ ।
बेपत्ता पारिएकाे बच्चासँग अर्काे छाेरा पनि साथमा सुतेकाे थियाे । आउँदा ठुलाे बच्चा सुतिरहेकै भएपनि सानाे बच्चा नभएकाे उनले बताए।
घटना लगत्तै स्थानीयले ठाटीकाँध प्रहरी चाैकीमा खबर गरेका थिए । रातिनै प्रहरी त्यहाँ पुगेर खाेजतलासी गर्दा कुनै ‘क्लु’ पत्ता नलागेकाे जिल्ला प्रहरी कार्यालय दैलेखमा प्रहरी प्रमुख सुनिल दाहालले बताए ।
’अचम्म लाग्दाे घटना भयाे,’ उनले भने, ‘अहिले पुन: त्यहाँ प्रहरी परिचालन गरेकाे छु।’
परिवारले बच्चा खाेजी दिनका लागि सामाजिक सञ्जालदेखि प्रहरीमा आग्रह गरेका छन्।
