सागर परियार, जुम्ला ।
जनप्रतिनिधि कुटपिटमा संलग्न जुम्लाका ३ जना आरोपित पक्राउ परेका छन् । तातोपानी गाउँपालिका –२ नम्बर वडा सदस्य मुनबहादु डाँगीलाई निर्घात कुटपिट गर्ने ३ जना आरोपितलाई प्रहरीले बुधबार पक्राउ गरेको हो । पक्राउ पर्नेहरुमा सोही वडाका विष्णु अधिकारी, प्रेम अधिकारी र टंक अधिकारी रहेका छन् ।
प्रहरीका अनुसार उनिहरुले जनप्रतिनिधि डाँगीलाई सामुहिक रुपमा कुटपिट गरेका हुन् । वडा सदस्यको हैसियतले हिमशिखर माध्यामिक विद्यालय तातोपानीको योजना तुर्जमाका लागि बैठकमा गएका बेला सार्वजनिक बाटोको विषयलाई लिएर आफु माथि कुटपिट भएको पीडित डाँगीले बताए । सार्वजनिक स्थानमा चरित्र हत्या हुने गरी उनिहरु म माथि गाली वेइज्जती गर्दै एक्कासी आक्रमणमा उत्रिए ।
आरोपित तिनै जनाले मलाई सामुहिक रुपमा लछारपछार गरी जमीनमा बझार्दै मरणासन्न हुनेगरी कुटपिट गरेका हुन्, उनले भने । स्थानीय रामबहादुर रावलका अनुसार घाईते जनप्रतिनिधि डाँगीको नाकबाट धेरै खुन बग्नुका साथै नाक र अन्य शरिरमा ठुलो चोट लागेको छ । उनलाई गत आइतबार दिउँसो निर्घात कुटपिट भएको थियो । भने प्रहरीमा मंगलबार मात्र जाहेरी दर्ता भएको थियो । सांघातिक आक्रमण गरी कुटपिट गर्नेलाई सार्वजनिक अपराध ऐन अनुसार कारबाही गरीने जिल्ला प्रहरी कार्यालय जुम्लाले जनाएको छ । आक्रमणबाट घाइते डाँगी कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा उपचारपछि घर फर्किएका छन् ।
